搬來瑞典之前，我有個一齊生活咗好多年嘅愛人。
我同佢都可算是青梅竹馬，自懂事以來我就開始學習如何去愛護佢、同佢好好相處。好多年嚟我邊度都唔願去，自覺只要留喺佢身邊就已經心滿意足喇。曾經佢係我嘅全世界，我天真地以為自己會同佢平平淡淡共度餘生。
我哋一直深愛住對方，直至若干年前家庭因素令佢變得性情古怪，我哋嘅關係亦因此變得愈嚟愈疏離。當時我咁啱遇上而家老公，於是我忍痛放下一切移居瑞典。可能好多人覺得住喺歐洲好似好爽，不過有苦真係自己知。啱啱嚟到嗰陣我食唔安、坐唔落，晚晚都夢見佢。
可能自己心底一直未放得低吧？到今時今日我仍然未能夠百分百融入呢度嘅生活。因為我深怕如果連我忘記埋，我哋呢段關係就真係會徹徹底底地完結。
呢幾年嚟，我只要一儲夠錢就會買機票返嚟，只為偷偷見佢一面。不過滿心嘅期望往往只帶來更大嘅失望；搭完十幾個鐘頭飛機、千辛萬苦返到嚟，每次都會察覺到佢又變咗……與其話佢係變咗，倒不如話佢年紀開始大，得咗失智症；佢變得性情古怪、貪慕虛榮、是非不分，佢直程變咗另一個人。幾年來自己總係帶住滿心期待返嚟見佢，依依不捨愛恨交纏咁相處一番，然後又總係淚流滿面咁走。流淚除咗出於不捨、牽掛，更加係來自自己嘅無力感。
你變得愈嚟愈陌生喇，你仍然係我從小認識嘅你嗎？我愛你，入心入肺咁愛你，但我唔再喜歡你喇。但無論如何，我都不願忘記你。
呢位愛人，是我的，也是你的。我仍然等緊浪子回頭。你呢，會陪我一直等嗎？