第一次聽到「有仇不報非君子」，是讀緊小學——某個小息，同學A隻金絲喵被同學B隻金絲喵擊敗時。
6月12日晨咁早，我看了一齣韓國片《惡女》，一個悲慘女子的復仇故事，我鍾意到不得了(有關齣戲的感受，留待下周詳談)。
散場後，當我走在那個位處金鐘黃金地段、滿布文明人士的商場裡，腦裡一直浮現「復仇」兩隻字。
今時今日此時此刻，作為一個正常香港人，仲有仇要報嗎？
你可以話冇。畢竟我們都不是郭靖，既沒有殺父仇人，也沒有背負家仇國恨，日常中令你最憤怒最難堪，可能是：1.你的Boss在明知就快掛八號波時都唔俾你早少少走；2.你的同事篤Your背脊；3.出外食嘢時本應提供妥貼服務的侍應竟報以「West面」(或名「西Face」)；4.冇朋友Like你的Facebook Po又或故意留言寸你。
咁當然，你可以話有。
1.你的Boss唔准你早走以致你要同成千上萬的人一齊等車迫車？實在不能饒恕！有仇不報非君子！不過第二日落狗屎時你如常準時濕住返工，因為你太明白「君子報仇十年未晚」這道理。
2.你的同事篤Your背脊以致你升職無望？絕對不能饒恕！有仇不報非君子！不過當同事請食生日蛋糕或散水餅時你又唔執輸拎番件，因為你同自己講，食餅同報仇，兩回事。
3.侍應向你報以「West面」以致你背脊骨落？點都不能饒恕！有仇不報非君子！不過你照樣俾(一蚊)貼士，因為從「俾(一蚊)貼士」這行為已充分證明了自己才是客，是高佢一等的。
4.朋友不Like你的Facebook Po又或故意留言寸你以致你在網上好冇面？極度不能饒恕！有仇不報非君子！不過你照樣即Like對方的Po，畢竟網絡世界如虛似幻，你既不打算投身KOL，同時認為真正的人生價值只會在實體世界呈現(如果有的話)……
我們這班正常人，就Keep住在新仇舊恨不斷累積而又不停自我消解的心理過程中，做不成君子(假設有仇不報非君子是正確的)，但同時又超越君子層次，成為一個恍如進行宗教修行的苦行僧。
苦行僧，自然頂得順塵世間所有苦行。
8號風球下又濕又焗地人貼人默默等車，是苦行。上到車，開始忍受無止境的塞車，是苦行。
你等到頂唔順上Facebook出個Po爆句粗？因為你未夠道行。
而真正去到最高境界的人，更能把很多人為的仇恨消解、忘卻，甚至感同身受地幫佢哋解釋、合理化——選舉事務處唔見咗兩部Notebook、遺失咗300萬選民資料？明嘅，畢竟管理架構協調不足，但份小組報告又客觀公正全面喎；忍受了特首五年？但好快我哋又會懷念佢囉……
一切仇人都預先被饒恕了，一切仇恨皆合理地被消解了。
但我們絕對不能容忍一篤雀屎，務必立即致電康文署斬樹滅雀B；那位勇於致電投訴的市民，且讓我叫你一聲君子。