今次我想歌頌君島友紀雄。早在上年已經收到風，話上環荷李活道會開一間omakase嘅壽司店，但一直只聞樓梯響，等到頸都長！終於，呢間壽司店喺上個月尾正式試業。君島友紀雄師傅出身自東京壽司家族名廚，由細到大都住喺東京築地市場對面，喺魚市場打滾咗幾十年，亦係東京老牌壽司店吉野鮨嘅第四代傳人。
成間舖頭只有8個座位，長木枱用上原條檜木，同時亦係放壽司嘅地方。師傅即席喺你面前握好壽司，再直接放上長枱，仲建議你用手拎嚟食，所以飯亦特登握得鬆軟一啲，做到入口即化。呢個亦係正宗嘅江戶前壽司。
4道前菜、10件江戶前壽司、卷物、麵豉湯加埋甜品，每一道都精彩到令我譁然。以剝皮魚壽司為例，赤醋飯上嘅魚肉加上一小塊魚肝，再放上辣蘿蔔蓉同蔥，整個配搭非常好，味道平衡，每一層都有唔同口感，最重要係魚肉非常新鮮，感覺好清新。
一路食，師傅就喺你面前一路手握壽司，感覺就好似睇咗一場免費嘅表演，胃口滿足到之餘，雙眼亦非常滿足。
海 UMI 上環荷里活道159至163號地下3號舖(2956 3177)