不同形狀的一磚一瓦，建築成本極高，莫非為了藝術，都幾難可以做到。
百年香港，有嘅係歷史。尋覓探索，味道在眼前。停留凝望，特色建築，處處盡見心思。縱橫建設，有新有舊，共存交織歷史。又係時候，開步遊走，認識我們的地方……
斜傾的建築主體配以橫向的流線裝飾，好讓設計意念起飛。
香港地少人又多，摩天建築多籮籮。放下手機抬頭觀看，樓宇密布遮蓋天空。建設與環境，挑戰如何共融，創新之餘，都要追求實用。建築不是容易，由創作到施工，從草圖至落成，將理念轉化為實用，正係設計師所堅持嘅風襟。
創意有價 設計難產
有一個女人，生於1950年嘅伊拉克巴格達，她雖然近十年滿載榮譽，但係之前嘅作品卻被指為紙上談兵、天馬行空，更被嘲笑為「Unbuildable」。全因作品過於獨立簡約，不論初期嘅尖角及大條直線，到中後段嘅只有曲線玲瓏，都係建築成本及施工難度極高。而佢就係獲得英國建築最高嘅Stirling Prize榮譽，「Queen of the Curve」嘅Dame Zaha Mohammad Hadid爵士。
曲線建築絕對不容易做到，除了需要藝術靈感之餘還需要技術知識。Zaha Hadid於黎巴嫩嘅數學系出身，1972年到英國倫敦後改讀Architectural Association School of Architecture。至1977年畢業並在學院任教。再到1979年成立Zaha Hadid Architects。而首次引來國際矚目正係1983年精彩絕倫嘅Peak Hong Kong(1983)，可惜有傳亦係因為造價偏高而沒有落成。有幸隨著電腦及建築技術嘅進步，相繼德國、美國、法國、新加坡、奧地利、台灣、丹麥、西班牙、中國，直至2013年，Hadid嘅作品才終於完成並出現於香港理工大學——創新樓。
地上清泉 設計風帆
Innovation Tower為設計學院嘅新大樓，樓高十五層，實用面積1.5萬平方米，初看無論色彩同外形都與四周方形盒狀嘅建築群格格不入，但又彷彿有如一股從地上泥土所爆發之一道清泉。秉除校園建築群既定之啡紅及方角，置於周遭剛中帶柔而自身又曲線嘅柔中帶剛，巧妙自然新舊融為一體，將整個PolyU帶進嶄新時代。
流線型嘅無縫大樓，其優雅讓心靈剎那平靜舒泰，置身當中根除雜念，停低思考。甚或一種被療愈狀態，啟發思想及創意。這份霸氣外露但當中柔情似水，創新樓不愧為亞洲的設計樞紐，「……a symbolic beacon and will drive the development of HK as a design hub in Asia.」。正係Hadid其成名始於香港的大師回饋，留下港人引以為傲之印記。而於2004年，其更重新設計The Peak Leisure Club，叫這二十年的昔日成名作品再來一次補足更新圓夢。
改善生活 設計使命
差之毫釐謬之千里，設計師草案上的堅持，改寫生活的環境。正如Hadid所講「……people want a better environment……They want to experience space in a different way.」。建築物不只改善環境與空間，還有人民生活的質素。2016年3月31日，一代建築師離世，終年65歲，而創新樓為她最後一批巔峰作品，植根香港。
創新樓反映環境與空間的使用，改善大學的學習環境。
室內空間設計盡見施工之複雜，可見成本之高昂。