煦和日麗、悠悠北風，人情味，海洋味，這笪綠土可以抵抗煩憂，這片水域可以擁抱自然；充滿溫暖陽光嘅低碳環境，連空氣都好似經過消毒，講嘅就係遠離塵囂嘅大澳。
矗立於石仔埗街渡頭小山丘上，不同年代仍為市民帶來生活的益處。
大澳其實係一個小島，靠一道架於橫水渡行人吊橋，「橫水橋」接駁大嶼山，蜿蜒於河上小渡，井然有序的棚屋，大澳因此成為香港主要特色景點而聞名。大澳島歴史可追溯至石器時代，有考古學家研究附近鹽田遺址，由宋朝開始發展鹽業，到明朝被佛朗機人(葡萄牙人)佔領成為據點，及至清朝為截斷鄭成功補給而實施「遷界」令，大澳島漁村一帶乃叫作「蜑家村」；除捕魚業興盛，昔日大澳有三分二土地用作鹽業，後來英國人接收管治後，於四十年代成為香港最大產鹽區，供港之餘更內銷大陸。而國共內戰時期，大澳更成為偷渡客嘅主要落腳點。
上至海盜，下至街坊家事
舊日大澳島位處「山旮旯」，由明清鹽梟猖獗，到海盜走私，到非法偷渡，改朝換代中，都同樣面對治安問題。早期離島或新界差館，多為又矮又細建築設計，位置多在山丘小嶺之上，可以居高臨下，大澳舊警署亦是如此。
1899年大澳警崗乃中式建築，仍源用清政府的名稱「衙門」，為鎮壓出沒於各離島及中國沿海海盜之餘，亦處理偏遠地區民事衝突糾紛。1902年香港警隊建立最早一批離島警署，於大澳碼頭山丘上，設立仍見於今日嘅大澳警署。警署主要大樓為兩幢兩層高建築，面對珠江口海域一覽無遺，主樓正中立上旗桿，陽台設有探射燈，山坡建有炮台，以中式方瓦頂、飛簷拱頂為經典殖民風格建築，風格亦具有文藝復興色彩，擁有一間捕房兩個囚室；警署主要特色為主樓與附屬大樓之間，一條相連有蓋行人天橋。
雖已更改為酒店用途，但昔日羈留設施仍得以保留。
遠至差館，近至文物酒店
大澳當年地理位置偏遠，執行職務或需要每次維持數天或數周不定，所以警署兩座大樓均設有宿舍浴室等設施，亦因為早期警隊一般為印度人「摩羅差」居多，所以當「差」或「差」館嘅「差」字，一直被沿用至今，所以附屬大樓另有浴室及房間宿舍，供當年「差人」使用。
五十年代大澳警署警務人員連翻譯及助理有16名人員駐守；1957年曾經重建部分及增建建築，以提供新增空間取代不敷使用的舊設備；隨著治安改善，1996年警署改為大澳警崗。2009年經評選，信和集團成立嘅文物保育建設公司，取得舊大澳警署經營權，同年警署被評為二級歷史建築；2012年保育活化後改為大澳文物酒店服務至今。
舊至活化，新至保留精神
歷久仍縈繞，嘗新亦優雅，今天香港各大小英殖時期差館，仍舊可以維持原有職能嘅已經不多，喺拆卸與保育之間，如何能夠保留活化而不失其精神，的確費煞思量。精彩如最具歷史代表嘅大館，或嘆息改為超級市場嘅赤柱警署，大澳舊警署成為文物酒店，反映大澳罪案減少得以生活改善。
1988年大澳舊警署被評為三級歷史建築。
大嶼山以西，被稱為香港水鄉威尼斯島。