「老婆，我打算生意上幫一幫Terrence。」那天晚上，我跟老婆如是地說。
「Terrence都要幫？佢生意不嬲做得仲好過你㗎喎。」老婆有點好奇：「發生咗咩事？」
「生意嘅嘢，好難講嘅，總之一言難盡。」我說：「生意人三衰六旺，今日你幫我，明日可能你幫我，如果做得到嘅，就做囉。老婆你會介意嗎？」
「要用好多錢？還是幫嘅過程有風險？」老婆問。
「做生意總有啲風險嘅。」我說：「錢，要使些少啦。不過還可以的。」
「總之呢……」老婆說：「唔會搞到冇錢開飯交學費，唔會搞到周身蟻，咁你就放心去做囉。反正做咗你先會心安理得，咁就去做啦。我冇乜所謂的。」
其實類似的情形，過去十幾年時有發生。許多生意上的投資，工作上的轉變，我都會先跟太太問過意見。中年男人，家庭負擔沉重，事業上每個決定，總少不免對家庭會構成影響。我認識不少朋友，每當他們要面對這些事情的時候，總會對另一半百般隱瞞。他們說：「講俾另一半聽，佢又要驚，意見又多，最後九成都係ban你叫你唔好亂郁。講咗出嚟反而仲要俾佢鬧返自己冇嗰樣搞嗰樣，倒不如呃佢咩都唔講做咗先算。」
結果呢？紙永遠包不住火。事情總會在某天神推鬼擁地被另一半知道，另一半於是大發雷霆，罵你當初為何不好好跟她商量？跟她商量了，問題就不致於現在這樣騎虎難下了。另一半越罵得兇，你心裡越火光，最終按捺不住，回敬一句：「同你講有用咩？一講你實話no way㗎啦！咁多年都係咁，我受夠啦，八婆！」結果是錢輸了，生意也敗了，最可怕，是連婚姻都破裂了。
維繫婚姻當然不是容易的事，生意人的婚姻，更加不易維繫。生意往往大起大落，過程中有無數抉擇時刻。犯一次錯，往往可以影響全家人得來不易的生活質素。作為生意人的另一半，也特別艱難。你心知生意人所做的決定，一不小心會讓全家一起受苦；但你也不可以每次都潑他冷水，讓他覺得你凡事都不予以支持。家中有大有小，你自然期望生意人能夠保守一些，安全一些，要冒風險最好越小越好；但這些都不現實。生意人面對的現實是不進則退，即使明知有風險，很多時候還是要放手一搏，否則那盤生意只會慢性死亡……還未計，生意人特別多人情債要還。還債，許多時候也是風險。
做生意人的太太不容易，當中的平衡要拿捏得準確，其實要很多智慧。太放任你怕會輸掉金錢，太管束你又怕連婚姻都輸掉，左右做人難，當中的難度，往往只有經歷過的人才能明白。