有焗過下麵包蛋糕嘅，都應該知焗個牛角包係一件幾咁繁複嘅工序。自製酥皮非常花時間，由製作酵母、發酵、牛油分量控制、摺疊技巧，甚至廚房溫度都要控制得好好，先做到酥脆有層次，兼帶有牛油香氣。Ritz Carlton嘅柯敬倫師傅負責酒店內6間餐廳同行政貴賓廳大部分的麵包製作，絕對係酒店嘅靈魂人物。當中牛角包食譜係嚟自Executive Pastry Chef Richard嘅，全球Ritz Carlton都跟佢呢個recipe，而柯師傅就負責做酵母同跟佢recipe做包。
市面上好多餅店為咗控制成本，會以人造牛油製作包點，但香氣唔及新鮮牛油，因此柯師傅一直以嚟都堅持用鮮牛油製作包點。加上之前消委會測試發現市面上18款人造牛油都含有基因致癌物，咁樣嚇一嚇，用鮮牛油整嘅包當堂又矜貴咗。可惜佢哋嘅牛角包暫時只於Lounge & Bar早餐時段供應，又或者住行政樓層可於club lounge享用，未有得買走住呢！
西九龍柯士甸道西1號香港麗思卡爾頓酒店