又到三家心碎一地嘅時間喇，呢兩日收到妹豬讀者inbox同我分擔心事。佢唔明點解每次自己全心全意去愛一個人，已經係無條件去愛，咩都俾晒佢，但對方總係感受唔到而失敗收場。其實對方又點會感受唔到吖，問題不在於感唔感受到，而係在於你太全心全意了。
乖乖唔好喊，愛一個人係好美好嘅一件事，不過有時我哋喺一段關係裡面太耐，太習慣去愛另一個人，反而會忽略咗自己。我哋成日聽到有人會因為冇錢而發窮惡，其實人一樣會為得唔到愛而發窮惡㗎。缺乏愛同有冇拍拖無關，最基礎嘅愛應該係自己俾自己嘅。而當你夠愛自己，成個世界都會變得唔再一樣。
當你夠愛自己，你唔會再因為其他人嘅睇法而去質疑自己。當你夠愛自己，你唔再逼自己去做一啲只求獲得其他人認同嘅事，例如夾硬同班豬朋狗友出去，為嘅只係一兩張貌似玩得好開心嘅大合照，然後放上IG等人哋覺得自己人緣其實唔錯。當你夠愛自己，你唔再因為唔係自己做錯嘅事而道歉。當你夠愛自己，你唔再將自己同其他人盲目比較，因為你明白人人本來就不一樣。因此連妒忌心都消失埋，對講人八卦再無興趣。當你夠愛自己，就算同個男仔出完兩次街之後佢冇再搵你，你再唔會徹夜難眠，唔洗再周圍問班姊妹，分析自己係約會期間有冇做錯到。當你夠愛自己，你唔會再怕自己搵唔到更好嘅對象，而留喺一段唔適合嘅關係裡面委曲求存。當你夠愛自己，你唔再嫌棄自己，因為你深知道無人完美。當你夠愛自己，你成個人都散發住開心自信嘅氣質，身邊嘅人都更加鍾意同你相處了。
愛情唔係一條加數，而係一條乘數。如果你本身係零甚至係負數，無論你有幾愛一個人，乘出嚟嘅都會係零，甚至更負嘅負數。好老土不過係真，唯獨你好好愛自己，你先有能力去愛另一個人。一名乾物女，過氣空姐，為愛由北區移居到北歐多年。熱愛地球同時喜歡講粗口，志願是能夠與動物溝通。
fb：為何斯德哥爾摩沒有譚仔三哥 by 三家姐 ig：sis3ter