跟一班現役在媒體工作的老友在其中一人的家裡飯聚，話題慢慢扯到「當時得令」的KOL身上。我和飛男都是經常在斗室中埋首寫稿的人，鮮有機會見到這些「網紅」，幾位資深編輯你一句我一句，我倆都只有聽的份兒。
A小姐：「真係唔知依家係乜嘢世界，有人會介紹自己『你好，我係KOL』，KOL係人哋畀你嘅稱謂……唔通劉德華自我介紹時會講『你好我係劉德華，我係明星』咩？」B先生：「係人開個IG或者FB fanpage就當自己係KOL，一開個page見啲粉絲個名唔係簡體字就係俄文名……擺明就係『賣粉』啦！」C女士：「有次去到個event，本來想早走返公司做嘢，點知原來有幾個KOL姍姍來遲，我八卦想睇吓佢哋咩樣，咪坐多一陣等埋佢哋囉；WTF，一個KOL帶埋老公嚟，一個直頭叫埋個菲傭帶埋個得幾歲嘅女同年紀唔細行得慢嘅阿媽……嘩，做節出街食飯呀？」
近來的確有不少品牌寧願找KOL都不想call報刊，朋友D小姐最近幫公司找KOL，所以向我索料，我跟D提到幾個名字，她都表示不認識，不知如何找他們合作，我說：「最簡單嘅方就係PM佢哋，佢哋feel到有商機就會好快回覆你啦！」一提到「最低消費」D小姐立即咋舌，說：「嘩咁我都去做KOL囉，咁好搵！」我又好期待打扮老套、目不識丁的D，會以甚麼形象進軍KOL界囉！ 一男一女兩個資深副刊記者，N年前一齊下海撈散，從此不想再受公司制度束縛。