如果你問我沖繩石垣島有咩好食，我只會答你石垣牛！喺石垣食到嘅刺身壽司唔及築地肥美，見得最多嘅係旗魚同吞拿魚。以旗魚為例，肉質細嫩，味道鮮甜，不過油脂比較少，如果你expect食到滿口肥油，咁呢度或者會令你失望。
位於公設市場旁嘅「与那国売店」，由一位八十幾歲嘅老伯伯經營。賣嘅係地道與那國美食(與那國係位於石垣島附近嘅小島)，好似由當地直送嘅長命草蕎麥麵、綠藻蕎麥麵，以及旗魚吞拿魚丼。由於賣嘅係傳統家庭料理，食材平實不華，調味簡單，絕非香港人期待嘅港女日本料理。老伯雖然唔識英文，但會用盡身體語言同大家溝通落單，更會為每位客人送上親手寫嘅多謝卡。最感動嘅地方，係佢會特登學習繁體中文，寫上祝福字句。喺与那国売店，你會感受到滿滿嘅人情味。
与那国売店
224 kawa, Ishigaki-shi, Okinawa-ken 907-0022