Formula-E(電動方程式賽車)舊年喺香港舉辦，好多市民都想參與，可惜貴飛唔夠人爭，轉去位於添馬公園及龍和道的E-Village都要每位300元，如果一家大細想去感受氣氛，都要諗一諗。不過，今年唔使諗，大會將免費派發2萬張門票，只要上網登記，等抽籤結果就有機會啦！
咪以為免費入場就hea你，除咗有特大屏幕直播比賽實況外，大家仲有機會近距離與偶像車手接觸，因為頒獎禮和祝酒儀式會喺添馬公園的E-Village進行，現場仲會展出多款前所未見概念車及創新產物。聽講去年的E-Village有超過30個不同界別，包括汽車、科學、娛樂及飲食界的合作伙伴參加，今年規模將更大，內容更豐富，即係話無論大人細路，賽車發燒友或非車迷，都總會找到樂趣。
大家留意啦！9月30日前到網站https://ballot.hkformulae.com/zh登記，每位參加者可申請其中一個比賽日門票一次，就指定比賽日選擇2至4張門票，抽籤儀式將於10月9日進行，結果會於翌日以電郵通知中籤者，若於10月31日後尚有門票未被領取，大會於11月9日進行第二輪抽籤，首輪未中籤者就會自動落入次輪抽籤。Ray已經搵晒所有親朋戚友幫手登記啦！
