上次講到Apple宣稱要封殺Epic Games喺App Store嘅開發者帳號，不過就喺事件發展到呢個程度時，微軟突然加把聲提交證詞，反對Apple封殺Unreal Engine(UE)，因為UE唔止係用於遊戲，仲包括物理、聲音、網絡等，連佢哋嘅《Forza》手機版都係用UE開發。有微軟出手幫拖，法院亦即時向Apple表示，唔建議用封鎖開發者帳號嘅手段，令Epic連更新UE都做唔到，因為咁會影響到其他使用UE嘅開發者。但結果係，8月28日Apple正式終止埋Epic嘅App Store開發者帳號，態度強硬到如來佛祖都冇面俾。從此Epic喺App Store嘅所有遊戲，包括《Fortnite》、《Infinity Blade》同《Battle Breaker》全部消失，可以話場交已經打完！其實搞成咁，Epic本身都有少少責任，因為佢哋已經承認開啟繞道付費機制，係刻意嘅行為，原因就係想迫Apple唔再收分成。不過呢件事竟然又影響埋Facebook嘅更新，因為新版本會喺用家執行內購行為(In-App Purchase)時，提醒用家Apple會抽取30%費用，但Apple認為呢個提醒完全冇必要，因用家唔係需要「額外俾錢」，抽成只係開發者跟Apple之間嘅條款，所以唔俾FB更新！到底最終又會否引起另一場戰爭？