電子錢包在港漸流行，出街買嘢都唔使俾現金，確實方便咗唔少。Visa即日起同蘭桂坊協會旗下嘅20間食肆及酒吧合作，只要客人用Visa payWave俾錢，即享不同餐飲優惠，包括自選飲品買一送一及折扣優惠，Ray帶埋一班朋友去蘭桂坊玩，都唔使驚銀包無錢俾啦。
Visa香港及澳門地區總經理戴嘉倩(圖左)話，揀蘭桂坊合作主要睇準對方係一個用膳好地方(best destination for dining)，未來一年仲會遊說更多蘭桂坊食肆設Visa payWave裝置，等更多市民體驗非接觸式的支付方式，又相信Visa payWave交易量嚟緊會有顯著升幅。
雖然本港非接觸式支付不斷進步緊，但蘭桂坊協會主席盛智文(Allan Zeman，圖右)噚日同Ray大嘆，香港喺呢方面仍然太落後，而中國更係帶領全球，幾乎每周要去內地公幹嘅Allan話，自己在當地搭的士用QR Code嘟一嘟就俾到錢，當地人都唔會帶現金出街，笑稱如果你用現金，簡直就當你來自另一星球呀，似乎香港確要加快腳步先追得上。