講到明就肉酸
商台教誨：「話到口中留幾句，理從是處讓三分」不過我半途出家，口不擇言，常禍從口出，而且金句亂用不如唔好用。好像有人胡亂拋出Warren Buffett的金句「別人恐懼我貪婪」，最後只會接到一手爛貨；難道進診所睇醫生也將病況留幾句，你以為細菌病毒就會讓你三分？職場路上，常常聽到「講到明就肉酸啦」再加多句「好明顯啦，點會get唔到呀」，我也是這兩句話的長期反對派。
有時候會聽到些別人的故事。朋友說自己交了辭職信，於是我問他原因，他說了幾個問題，我反問他有沒有向上司表達過？猜不到他說沒有，「唔講啦，講到明就肉酸啦」，我R頭，再反問「你覺得你上司知唔知道你其實在意呢啲嘢？」得到回應就是「好明顯啦，點會get唔到呀？」甚至「咁都get唔到，走得啦。」員工多數只是對應一個終極上司，但上司卻常有多位(不同部門的)下屬，很多時候大家以為上司一定知道或者在乎下屬心目中的「問題」，其實不然，上司可能一直心想「哦，小事嚟姐，遲啲搞。」遲啲遲啲……下屬的感冒就成了肺炎，要命了。
溝通就是又簡單又複雜，你以為人家明白，人家以為你明白他根本不明白。簡單的解決方法，就是當大家都不明白，甚麼都說出來，說到盡，說到清，說到無話可說，話到口中不留半滴，然後要再解決的，就不會是誤會和溝通，而是問題的本質了。「我暗示過我做嘢辛苦好多次啦，仲唔加人工？」「個個返工都話自己辛苦……同埋知道你辛苦，咪同你講聲加油，放下假休息下。」「我覺得自己underpaid咪走囉。」「咁而家佢話加俾你，你留唔留？」「唔留，而家加就遲啦，搞到我好似R返嚟咁。」上司可能不諳管理，下屬卻永遠覺得有問題的只是上司，到有朝一天，下屬突然明白了其實每個人都有自己的處境，或者就是他能當上司的時候了。
題外話是，那位朋友告訴我，上次撞車後，他連環媽叉人的故事，我反而覺得「唔使講到咁盡嘛？」不小心有些小碰撞而已，卻連老母都拿出來了，這種坦率能轉化在職場可行嗎？「X，賠錢呀！尋晚我OT咗，如果唔係報警！」