話說我有一晚瞓到半夜突然扎醒，之後瞓極都瞓唔返。天寒地凍，一碗酸辣湯麵嘅影像喺我腦中揮之不去。諗住求其淥個麵啦，點知搵勻全屋麵餅都冇個，想喺瑞典搵間廿四小時營業嘅便利店更加談何容易。喺理智線斷裂嘅清況下，我決定自己整麵食！
我喺網上面搵咗個簡易嘅雞蛋麵食譜，自己再加以改良。一人分量雞蛋麵，材料有雞蛋1隻，中筋麵粉100克，鹽1克。首先將麵粉、鹽混合，再邊攪拌邊慢慢加入打好嘅蛋液，用手搓勻。將麵糰包上保鮮紙等40分鐘。呢個時候可以整定自己喜歡嘅湯底或調味底，我今次整撈麵。求其將蔥、蒜同辣椒加埋，燒熱油灒上面，再加入豉油、醋、鹽同糖調味就可以了。等麵糰休息完40分鐘後，再搓過一兩分鐘。之後用擀麵棍將麵糰擀開，切成自己心目中嘅形狀。如果怕麵條互相黐住可以喺佢哋之間灑啲麵粉，之後就可以煲水淥麵喇。記得唔好心急一次過淥太多喎，淥麵嘅時間視乎麵身嘅大小厚薄，一般一至兩分鐘左右就可以喇。最後將麵條瀝乾水分，再撈埋剛做好嘅酸辣汁就大功告成！
我用咗大概兩小時去完成碗麵，又搓又擀，兩臂攰到不得了，而且我由非常肚餓等到冇咗飢餓嘅感覺。喺我食完麵瞓醒嘅第朝，最令人難以接受嘅事發生了……我喺雪櫃深處發現一碗隔夜嘅泰式炒金邊粉，噚晚白忙一場，原來呢碗麵一直存在。
不過自己辛苦整出嚟嘅麵又真係特別好食，而且至少我學識自己整麵食，一技在手，以後就算要搬去杳無人煙嘅北極圈我都唔使怕。歡迎去我Instagram動態精選睇雞蛋麵嘅製作過程。