今日咁啱有啲事要做，打算坐巴士出城。點知一行到去巴士站度就親眼見住架巴士毫不留情咁開走，下一班車要等20分鐘。
雖然巴士走咗，不過瑞典嘅陽光咁寶貴，難得有機會曬吓太陽吸收吓維他命D其實都不錯。我坐咗喺巴士站嘅小木凳享受陽光，冇幾耐有位婆婆慢慢行埋嚟坐低咗。婆婆嘅一頭銀髮喺陽光下閃閃發亮，佢著住對老人平底鞋腳仔細細咁，面帶笑容望住個天空。呢一幕實在太美好太可愛了，於是我忍唔住搭訕阿婆，同佢打聲招呼順便同佢講佢好靚。
婆婆聽到之後笑得好開心，佢話自己結婚多年，仔女都大個晒，老公又老到add add聲，自己好多年冇比人讚過靚喇。傾傾吓佢話原來自己唔係等緊巴士，而係等緊個女嚟接佢。之後婆婆問我去邊話車埋我，點知咁啱又順路喎！於是我就坐住順風車出城，沿途風光明媚，氣氛出奇地唔尷尬，最後我仲比原來時間早咗到𠻹。
好多時一件事嘅好與壞，好大程度在於你嘅態度；當你習慣咗眉頭深鎖，無事都形住自己頭頭碰著黑，一件再平常嘅事都足以毀掉你嘅一日嘅心情。
而當你學會為小事感恩，你自然會吸引到更多值得你感恩嘅事。冇錯呀，吸引力法則就係如此簡單。明白現今香港社會嘅氣氛低迷，好多事更加唔係喺我哋能力範圍內能夠控制，只希望呢件小事能夠溫暖到你。活喺今時今日嘅香港真係好需要互相支持。
無論生活再忙碌，可別忘記拍一拍自己膊頭，俾個肯定自己。生活再累人、路再漫長，別忘了我哋還有彼此。