養「鬼仔」係會養到個人性情大變，好似PK Ma，份人一向好PK好躁狂，不過呢位憤青嫁咗人，開始養「鬼仔」之後，成個人都變晒，「鬼仔」要佢做咩都OK， 躁狂PK Ma變咗做溫馴OK媽。
OK媽養嗰隻「鬼仔」就係佢個5歲大嘅寶貝仔，佢成日話：「我個仔鬼仔嚟㗎，淨係鍾意食麪包；我個仔鬼仔嚟㗎，淨係肯講英文；我個仔鬼仔嚟㗎，同邊個都易friend。」OK媽仲講到佢隻「鬼仔」乜鬼都識，又識訓練屋企隻狗，又識用app整聖誕卡俾嫲嫲，連電器說明書都識睇！嘩，有冇咁猛呀？唔通OK媽平時做嘅Proposal，都係佢隻鬼仔做嘅？但應該唔會，佢隻鬼仔咁猛料，OK媽啲Proposal咁小學雞，一定係OK媽自己做。
上兩個星期，OK媽帶咗佢隻「鬼仔」參加公司個親子大旅行。隻「鬼仔」一上到旅遊巴就開始作怪，不停踢椅背，震到我背脊到頭頂都痛埋。我忍唔住同「鬼仔」講「Stop，Sit」，隻「鬼仔」唔單止冇停，仲發狂猛踢椅背話 「I just want to play，Ok? 」我都未答NO，OK媽已經搶住笑晒話OK啦。係嘅，個仔咁活潑，咁精伶點會唔OK呀？佢叫我同坐隔籬嘅同事Alison換位，好提議喎！ Alison椎間盤突出，醫咗好耐都醫唔好，或者「鬼仔」震椅可以震到人哋椎間盤歸位呢。
平時大圍食飯，OK媽成日鬧同事食唔晒，又叫到成檯都喺；食飯又唔叫人，鬧到大家都唔肯同佢食飯。佢對住自己隻又冇禮貌又大嘥嘅「鬼仔」，即刻做咗阿四，俾隻「鬼仔」猛咁點佢出去攞嘢食。OK媽攞到成檯嘢食供奉「鬼仔」，「鬼仔」樣樣嘢都係食一啖就唔食，佢話：「I don’t like it，Ok? 」OK媽好温柔話：「OK，呢度冇咩嘢好食。」吓？喺五星級酒店食自助餐都冇咩嘢好食，平時OK媽一定係放自己啲血餵佢。