對於鰻魚飯，我一直有種情意結。本身唔鍾意食魚嘅我(主因係怕骾骨)，獨孤「兩」味，只係鍾意食鰻魚同鱈魚。
去到日本名古屋當然要一試長龍店—蓬萊軒嘅鰻魚飯啦！蓬萊軒喺名古屋有幾間分店，諗住都叫分散投資，應該唔使排好耐嘅，仲懶醒咁12點前就去到排隊。點知電梯門一打開，條龍已經轉咗幾個圈，目測至少有過百人。等左個幾鐘，終於入到去，諗都唔諗就叫咗最original嘅鰻魚飯三食。建議食法係先將飯分為4份，第一份就咁試過原味；第二份就可以加蔥粒、紫菜絲同埋Wasabi調味；第3份就可以加入熱湯同埋頭先嘅調味料；至於第四份飯，就寫住：隨你喜好享用。
鰻魚汁調味濃稠適中，甜度平衡。每件鰻魚燒到微微脆邊，魚肉軟綿，調味並冇蓋過魚鮮，最重要係冇我最驚嘅魚腥味！放入口第一啖就明白，難怪咁多人排隊啦！或者唔少遊客都好似我咁諗，去旅行做乜嘥成個幾鐘排隊食一碗飯，不如留番啲時間行街好過啦！所以排咗15分鐘，我都諗住放棄㗎。不過環觀四周咁多日本人，要知道日本人對食有一種堅持，就覺得：唔！今次冇死錯人喇！耐性同堅持，就俾我等到一碗完美嘅鰻魚飯，絕對係值得嘅！
名古屋蓬萊軒 名古屋榮站松坂屋南館10樓
http://www.houraiken.com/