今日我要講嘅係一啲我聽返嚟嘅真人真事，都係俾鬼騷擾、俾鬼整蠱。有人從此唔敢一個人住酒店，有人甚至連屋企都唔敢返。
而我地故事嘅主角，係一位退休救護員。以下係佢嘅自述。
救護員年輕嘅時候，駐守喺機場消防局裏面嘅救護站。消防員同救護員一般都係分開工作，分開休息。可是因為機場消防局好細，比救護員休息嘅地方有限，所以消防員同救護員整日會質埋一齊。嗰晚好凍，但幾個救護員決定唔喺休息室裏面，費事俾出更嘅消防員嘈醒。局裏面有一間好細嘅健身室，四面都係玻璃，中間擺咗啲健身器材。喺烏黑嘅石屎地好凍，佢哋執咗啲紙皮，鋪喺地下，坐咗喺度傾偈。過咗一陣，望一望手錶，仲有幾個鐘頭先到天光，又未有排更任務，所以佢哋三個決定瞌一陣。
就咁瞓喺地下，故事主角瞓喺最裏面，旁邊就係一塊鏡。個度好黑，緊急照明紅色光線，反映喺鏡上面，有少少刺眼，但係唯有將就。大約過咗半個鐘，主角半睡半醒，轉身面向塊鏡。突然，佢感覺到有啲嘢郁，本能反應，佢想再睇清楚啲，就捽開眼。點知一望，馬上嚇醒，鏡裡面出現咗一個着住白色衫嘅女鬼。正確啲講，佢身上披着一塊白色布，長到落腳。個女鬼留好長頭髮，長到可以到腰。同場兩位救護員，一早已經瞓到扯晒鼻鼾，根本唔知道發生緊咩事。
女鬼喺門口，慢慢咁飄入去健身室，先望一望瞓喺地下嘅人。最外面嗰個側身咁面向門口，長髮女鬼就從頭開始到腳，哄嗰頭埋去係咁聞。中間來回咗幾次，愈聞愈享受。之後佢再重施故技，向中間嗰個埋手，又係一樣，由頭聞到落腳。第二位同事原先打鼻鼾最大聲，但當嗰女鬼聞嘅時候，佢一啲聲都無，好似死咗咁。最裡面嘅救護員驚到震，喺塊鏡裏面望到眼甘甘，佢同自己講︰「唔好俾佢發現我睇到，一於扮瞓。」但自己又抵死，時不時偷偷裝下佢做緊乜。終於輪到佢啦！女鬼慢慢飄到佢個頭頂，然後將個頭貼住佢塊面。救護員驚到成個人僵硬咗，唔知係自己問題，定係個女鬼搞事。但係，個女鬼竟然無聞到佢，只係慢慢咁貼埋去耳仔，好細聲，好細聲，慢慢咁講︰「聽日輪到你啦！」個救護員聽完之後，根本郁唔到，彷彿對外面嘅世界無晒反應。過咗一陣，佢先恢復返力氣，坐起身，望到嗰個女鬼嘅身影，慢慢咁飄返出去。到第二日，佢唔敢同另外嗰兩個人講，亦都唔敢再夜晚喺同一地方，寧願成晚坐係架車度，開住眼扮精神。
各位，除咗呢位救護員，其實世界上好多遇到被靈騷擾嘅人，發生喺唔同嘅地方...
另一位係T女士，係酒店房遇到嘅鬼騷擾。當日佢參加一個商務會議，晚上入住主辦方提供嘅房間。她住咗之後，發覺總係心諸不寧，成日形住唔妥，但又講唔出點解。房間裡有一個衣櫃，正對著床，櫃門總係閂唔埋，有條好大嘅縫。話說晚上大約3點鐘，T女士突然感到有人𥄫住她，喺黑暗中有雙大眼睛，每2、3秒便眨一次眼，但從無動靜。她想起身，但手腳都麻痺晒，用唔到力，掙扎咗一陣，T女士先勉強企起身，用咗分幾鐘嘅時間，才走到5呎外嘅衣櫃，小心打開佢，先發現，個對紅色嘅眼睛係衣櫃裡面，正正咁望住自己。當晚T女士嚇暈咗，醒返時候先知道自己去咗醫院。
第二位係個男人W，佢去到中國廣西某個小城市，參加直銷大會。喺酒店瞓咗晚，瞓到半夜，突然聽到廁所水龍頭有開水聲，又閂，又開，又閂。佢下意識以為係水龍頭壞咗，朦朧間又唔想起身，索性繼續大覺瞓。點不知過咗一陣，水龍頭聲突然轉換為花曬聲，而且維持住一直噴水，中間仲隱約夾雜把女聲，喺度「咿咿哦哦」。佢個人即刻醒晒，起身走去睇。佢慢慢行去浴室，打開門，摸黑開燈，喺熱水既水蒸汽之間，佢竟然發現喺淋浴間，企咗個女鬼，無著衫，有頭髮但睇唔到塊面。佢今次無嚇暈到，而係嚇到語無倫次咗兩日。
第三位是個中年大肚腩男人W。他同朋友飲酒到後半夜，返到酒店床已經係早上4點幾。但他話自己一直無醉，仍然非常清醒，仲回咗幾個電郵先瞓。佢記得只係瞓咗大約半個鐘，身體突然就動彈不得，直情係「俾鬼砸」，腦仍然可以運作，知道發生緊咩事，眼睛都可以運作如常，周圍望，只係個人郁唔到。呢個時候，突然有種用硬幣刮牆嘅聲，刺耳到爆，維持咗大約幾分鐘。W掙扎想走，用盡九牛二虎之力，先起到一半身。正好見到床尾，有對好瘦嘅手，長指甲，抓住床邊，係咁用力抓，成個床塾直情凹咗落去。W成個人嚇到叫咗出嚟，仲碌咗落床，係地下碌咗幾個圈。大件事，呢下佢先見得清楚，係個無下半身既人，著白色底衫，同樣係個肥佬，仲望著佢係咁笑。
輪到第四位V小姐。雖然件事已經係幾年前，但佢同我講嘅時候，個人仍然驚到好唔自在。佢話說參加一個外國嘅網上課程，最後要去國外實習。課程安排同另一個同學一齊住酒店，但因為對方臨時有事嚟唔到，所以得返V小姐一個人入住酒店走廊嘅尾房。晚上聽完講座，佢自己返房。開門嘅時候，聽到一陣音樂聲。佢自己描述，係音樂盒嘅聲。音色好清脆，好清晰，完全係個種上鏈音樂盒。大概10秒到，音樂突然停咗，房間再無其他聲。V小姐明明記得自己間房無音響，咁啲聲又點嚟呢？不過佢平時夠大膽，繼續行入去。正當佢想插卡開燈嘅時候，突然一把細路女嘅聲，同佢講野。把聲好尖，仲好嬲，係咁講︰「唔好開燈啊，叫你唔好開燈！」重複咗兩次。佢嚇到當時企係門口唔識反應，同我講嚇到瀨尿。佢之後慢慢轉身走，後面又響起音樂盒聲，中間仲夾雜咗D細路聲……
下回繼續