又有位H先生，同佢老婆去台灣度蜜月，入住一間鄉鎮嘅小酒店，樓高只有3層，入住房間306號房。夜晚8點幾，H太太坐係床度玩手機，H就剛剛沖完涼出嚟。突然，門響起叮噹，H係防盜眼睇，外面咩人都無。開門，兩邊都無影，心諗邊個玩野。過咗一陣，都係小心啲，直接打去大堂搵人上嚟睇睇。大堂經理答應轉頭搵人處理。電話講完 剛剛放低，門鐘又響。H同老婆一齊企埋門口，防盜眼一睇，又係無野。佢今次趴低睇下門隙，發現有對腳，黑色高踭鞋，對腳好肥。佢馬上叫老婆行開，數三聲，再打開門...外面一樣係無人。H口震震，同佢老婆講︰「頭先…明明有對腳…係度。」兩公婆面都青埋，慢慢好細力咁閂埋度門，再唔敢郁，一直企係個門口成分鐘，一直等，都再無聲響。H再打電話去大堂，問點解仲唔叫人上嚟睇。個經理話已經搵咗個同事上306號房，仲有個女人應門。H聽到之後，成個人飆冷汗，即刻兩公婆用5分鐘時間，打包所有野，行樓梯直奔大堂。佢搵到之前去拍門嘅房務，個房務話︰「個女人只係打開咗半扇門，著黑色TEE，踩住高踭鞋，睇個樣無咩特別，由此至終都無講野。不過佢突然諗返起，間房無著燈，但係有啲光喺後面閃下閃下，隱約見到有個細路坐喺地下。」H先生同佢老婆成晚就瞓喺大堂，第二朝直接返香港。
除咗酒店，有人喺酒吧廁所都遇到過。P小姐有晚同朋友去尖沙咀飲嘢，突然肚痛，去咗有3格嘅女廁。佢個人比較小心，行入去嘅時候，先確定環境係咪安全。頭個2格廁所都打開，無人喺度，佢就直入咗第3格。正當佢享受緊寂靜空間帶嚟快感嘅時候，突然聽到隔離廁格有動靜。廁板好似俾人拎起、又放低；再拎起、又放低..不停重複，每個動作相隔1秒，並且好有規律。佢好肯定佢入嚟之後，再無聽到有人開鎖入嚟，所以心諗邊個喺度玩野？邊個又可以入到嚟依度玩？隔離玩廁板嘅聲仍然繼續，佢個心跳得愈來愈快。佢slow motion咁探低個頭，從下方嘅門隙去睇。兩個廁格，一個人都無，半隻腳都睇唔到。之後佢坐返起身，唔敢再郁。半分鐘，廁板嘅開合怪聲又響起，而且規律一啲都無變過，打開；合上打開。突然，有女人喊，喊聲由隔離廁格傳出嚟，喊到仲上氣唔接下氣咁。不過喊聲只係持續咗半分鐘，突然成個世界又靜晒。P小姐本身已經嚇到想一齊喊，但最後都係自救要緊。佢終於鼓起成世人最大嘅勇氣，慢慢打開門，慢慢行，咪埋三分二隻眼，咩到睇唔到。當佢經過第2格嘅時候，偷偷望咗一眼，裡面的確鬼影都無隻，佢先放咗半個心，再抖咗啖氣繼續行。經過第一格，佢又好小心，擰咗四分一頭，瞄咗裡面一眼。今次大穫，有個著住花裙既女鬼，成塊面爛晒，前胸仲插住把刀。坐係個廁所，雙眼紅到蕃茄咁，當時直線咁望住P小姐。P小姐而家諗返，仲記得嗰時佢嘅眼神，佢自己講︰「望住我，一啲表情都無，又唔嬲，又唔笑。」之後P小姐爬著咁離開廁所，係過程裡面，佢一直唔敢開眼，一直唔敢抖氣，最後佢出嚟先感覺到痛，原來個背脊被人用指甲劃傷晒…..
最後一件「真鬼真事」，有關一對夫婦，佢地姓K。佢新居入伙，開開心心。入住3個月，一直咩事都無發生，平安過蘋果。直到第4個月，佢地先至發現怪事。原來一直有同屋主，而且仲係有6個。K同我講︰「個晚我老婆先入房瞓，我係度睇波到2點幾，但個人一啲都唔覺得攰。之後熄好燈同電視先入房。當我打開門嘅時候，隱約睇到床對住嘅窗簾郁咗一下，但我肯定窗戶當時係閂咗，唔係被風吹起。於是我行埋去睇，約3呎嘅距離，我先睇清楚，窗簾下面有幾對腳，好似一排人咁企喺窗簾後面。嘩，我當時嚇到真係叫咗出來，跟住我老婆都被我嚇醒咗，馬上開床頭燈，問發生咩事，係咪有賊。我指住個窗簾話後面有人，佢起身好嬲咁行埋去睇，鬼影都無隻，嬲到火起，仲起勢咁鬧我發雞盲，罸我成個月唔準睇波。」的確，真係過咗一排，相安無事，K先生當個日真係自己睇錯，無擺件事喺心。但過咗無幾耐，突然一個夜晚佢喺幅牆度，見到幾個人嘅頭輪廓，有眼有口有鼻。佢捽下眼，又發現無咗。不過從此以後，成間屋開始唔對勁。燈成日自己著，電視畫面又不時跳，仲有怪聲喺幅牆到傳出嚟，成日好似有人講野咁，仲係咁嗌交。直至到有一日，佢同老婆夜晚返屋企，先發現書房入面企咗個人，背對著佢地，仲同佢老婆講︰「你地返嚟啦。」之後喺個廳，同時出現咗5隻鬼，全部血淋淋，望住佢地係咁傻笑。
今晚K先生同我講完呢件事，飲咗啖熱茶，轉身拎起個腰包就走。個時我先發現，原來佢都無腳……