【上集講到】老字號樟記結業、大張過身了、細張又放棄香港業務……辦公室一眾同事討論時，空氣中瀰漫著一片愁雲慘霧的情緒！怎料趙總的加入，只是一個情報，換一個角度，整件事件就完全不一樣……
【性格學應用於職場】
趙總：「細張喺叻仔嚟嘅！又浸過鹹水！只要佢願意，肯承擔，樟記有佢領軍，應該無問題嘅！」
畢哥：「聽你咁講，好似佢老竇無佢咁叻咁？」
趙總：「就係知道大家唔明……所以睇完阿仔學校講座張資料，勾起咗我嘅靈感，正打算跟大家分享，點知你哋正喺到錯判緊樟記嗰個案！」
碧姐：「嗰講座係唔係我哋早兩年跟商業顧問上堂學嗰個DISC四種性格呀？」
趙總：「咪就係DISC囉！大張唔係唔叻，佢係C型為主，些少D型……呢種類型，正正就是上一代的創業/守業者的特質，當然，傳統中國人嘅文化，好多男人都喺C型。」
楚丁：「趙總，平時唔覺唔覺，你依家好似好迷信星座算命嗰啲嘢咁……不過唔緊要，我哋呢啲後生女最鍾意！你講多啲嚟聽下吖……咩叫C型為主，些少D？咩叫好多中國男人都喺C？」
趙總：「呵！難得大家有興趣，又正正喺大家喺工作上嘅盲區……阿碧，妳夾個時間，搵顧問過嚟，幫大家安排一次退修，等大家大開眼界一下啦！」
碧姐：「好呀！係咪跟返你上次話：去主題公園，訂個會議室，上完培訓堂，食埋嗰buffet，然後讓成班同事跟家人喺園區自由行，玩埋下半日……嗰個構思呀？」
趙總：「完全正確！有阿碧，我放break！」
碧姐：「趙總過獎啦！呢啲公司嘅事，喺我份內事嚟嘅！」
楚丁：「咁即是現在無得聽！要等到退修先至有得聽？」
【性格影響抗壓能力】
趙總：「嗱！平時又唔見妳咁好學！好啦，我試下攞住阿仔小麥文化份資料，跟大家分享些少……阿碧，我知妳讀書叻！記性好！若果我講錯咗，妳提下我喎！我仲記得妳上次上培訓堂，分數高我一大截！」
碧姐：「趙總過獎啦！我試下……」
趙總：「大張喺C型，重規矩，守承諾，呢啲優點令佢專心、專注，唔易受其他事情干擾，自得其樂！只可惜，萬一發生一啲好震撼嘅意外，呢種性格就會招架唔到，因為始終屬於彈性唔夠！」
碧姐：「趙總，我就喺C型，唉！我經常都發覺自己彈性唔夠……」
趙總：「阿碧唔緊要！妳唔記得上堂老師話：若果C型上面有D型，萬一有事就咨詢D型意見，好讓D型作主後，C型就會有新嘅方向，繼續緊守落去……」
碧姐：「記得！趙總，你咪喺我上面嗰個D型上司囉！」
趙總：「啱喇！我同妳喺最佳拍檔！」
畢哥：「咁細張嘅D型，喺咪跟趙總一樣呢？」
趙總：「連阿畢都好有興趣咁喎！我喺純正嘅D型，細張主要喺D型，但有些少I型，咁就唔同晒啦！細張嘅I型，應該同阿畢你差唔多，加埋年紀都接近，所以你倆嗰咪好啱key囉！」
畢哥：「我都喺I型！你又知？」
趙總：「你唔信嘅話！你跟我仔份資料上面份問卷做一次，你咪知囉！」
畢哥：「係咪掃呢嗰QR？」
趙總：「係呀！得10題之嘛！好快就做完！」
畢哥：「嘩！不得了啦！真喺比趙總估中：I型70%，S型30%」
趙總：「嗱！雕蟲小技嚟啫！到時退修堂，嗰位顧問嚟到，仲犀利！一見到你就可以估中你咩型！唔洗做問卷！等阿碧安排好，你記住日子去上堂，咪放飛機呀！I型嘅優點就喺容易跟人拉關係，社交吹水就無得彈！性格又樂天，只可惜……」
畢哥：「只可惜天妒英才，太靚仔！啱嗎？」
趙總：「嗱！你真喺人如其名：『崔畢源(吹不完) 』！你嘅缺點就係人都知啦！楚丁，妳同佢最friend，妳話佢知……」
楚丁：「咪就係大頭蝦！經常錯漏百出囉！」
畢哥：「樣樣嘢都跟到足，唔洗出去見客？唔洗出報價單？唔洗幫細張上網查下啲波衫情報咩！」
趙總：「無錯啦！呢啲正正就喺一個團隊當中嘅巧妙配搭！我唔通唔知畢哥大頭蝦咩，但我亦深知道阿畢背後有支援佢：S型既楚丁，同埋監察著佢：C型既碧姐，我都唔知幾放心！我點解升阿畢？就係佢有嘅I型基因，喺我自己無嘅！所以，阿畢你都補充咗我嘅不足位……」
畢哥：「趙總，乜都比你睇通晒咁！咁點解細張去泰國搞開發單嘢，佢又唔搵我，你又唔俾我跟，留返俾自己跟呢？」
趙總：「呢啲就喺細張叻嘅位啦！佢知道開發方面嘅嘢，唔係靠吹水；加上，就算佢氹到你，喺報價方面攞到些少著數都無用；嚟緊，樟記嚟泰國嘅新公司，一定係開新戶口，所以佢干脆搵我，直接了當！」
畢哥：「今朝：聽君一席話，勝讀十年書！碧姐，落實咗退修堂嘅日期、時間，勞煩第一個通知我，我推晒啲約會都要上呢堂……咩…D…ABC話？」
眾人齊聲：「DISC呀！I型大頭蝦！」
辦公室瀰漫著一片茅塞頓開、期待上課的積極情緒！
【註】DISC網上評估：
《EC職場周記》角色介紹
本劇主要圍繞4位主角，分別是兩男兩女。
趙達標：總經理。任務導向，人緣方面就……
崔畢源：銷售經理。開朗樂天，講就天下無敵……
歸楚丁：初級文員。任勞任怨，平易近人……
沈碧堅：行政主管。有原則，要求甚高……