龍景軒已連續十三年奪得米芝蓮三星
龍景軒signature皇湯雞絲羮
為何我會稱龍景軒做世一中菜？他是全世界唯一一間連續十三年攞米芝蓮三星嘅中菜廳，其餘所謂對手難望其項背，世界第一當之無愧。而我趁著來四季酒店staycation時順道拜會一下。先談談餐前小吃，一粒炸丸子入口稍燙，熱度掌握得很好，令我忽然想起龍景軒行政總廚陳恩德師傅喺訪問中的一句說話：「一熱遮三醜」！粵菜最講求就係溫度，只要稍微唔夠熱，味道就變得溫溫吞吞，以我行走多年高級中菜廳嘅經驗，碟餸唔夠熱，好多時係廳面同廚房配合不足所致；而龍景軒喺呢個關鍵位置安排得非常出色，是夜set dinner上菜步伐緊隨我嘅節奏，每當我食完一道菜，會微微有個停頓位再上另一道，而且每道菜都好夠熱，毫不拖泥帶水，侍應們應記一功。另外，入坐時還以為會比較拘謹，當我看見滿場飛的侍酒師Bernard Chan走路時無意之中的一個華麗轉身，以及為我送上來自哥本哈根的氣泡茶，還有一杯柔情似水的布根地村級紅酒，頓時感到輕鬆自在，服務絕對係三星級！
餐前小吃
哥本哈根的氣泡茶
●廚師精選拼盤—─龍帶玉梨香，德哥在麗晶時代的成名之作，由龍蝦肉、帶子、啤梨一層一層組成，夠熱！集香口爽甜於一粒，不油不膩。蜜汁叉燒，當各大酒店都用西班牙豬，龍景軒卻用返本地豬，偏向傳統口味仲要係半肥瘦，入口微暖，而乳豬件亦香脆有溫度。
●皇湯雞絲羮—─龍景軒signature之一，色澤金黃稠身，只要喝一口，彷彿有過百隻雞衝向你味蕾似的，根本全部係雞嘅精華！幼細的雞肉絲、筍絲等等盡顯刀功，底部有小火保持溫度，由第一啖食到最尾都係熱，頗適合秋冬季節，我敢講呢個雞絲羮唔係世一，係宇一！係全宇宙最好食！
●薑蔥籠仔蒸星斑柳—─絕無花巧賣弄，用最簡單嘅方法蒸魚，就係最佳選擇。魚固之然蒸得好，由薑蔥星斑以至豉油都係上乘，重點係：好夠熱！
龍帶玉梨香
偏向傳統口味的蜜汁叉燒
薑蔥籠仔蒸星斑柳
非同飯響
香芒楊枝甘露
●非同飯響—─米形意加碎牛肉XO醬炒嘅一個飯，用煙韌嘅米形意代替白飯，強勁鑊氣加上香辣惹味XO醬，會愈食愈熱。
●香芒楊枝甘露—─楊枝甘露，只要芒果一酸就玩完，而龍景軒用嘅芒果係熟到透嘅呂宋芒，香甜好吃。其實同日下午喺酒店另一餐廳吃到嘅芒果醬同樣出色，八卦嘅我向侍酒師Bernard請教，他說：「因為香港物流業非常高效率，而我哋只會要最熟嘅芒果，一送嚟就係最佳狀態。」
拿捏得宜，代表能耐。龍景軒所有環節都有極致追求，世一得來不容易。
龍景軒Lung King Heen│中環金融街8號香港四季酒店4樓 │31968880
世一中菜！龍景軒
有個人名字的dinner menu，十分精美。