上一次去中環四季酒店Sushi Saito(鮨．齋藤)食Omakase，已經係2018年，事隔4年後終於再訪，主廚由Kobayashi san換上Kubota san，整體比初訪時進步，應該是Kubota san比較精練吧，每當他手握壽司放在碟上時會微微沉降，空氣感強烈，意料之中好吃，不贅了。反而壓軸出場的太卷令我吃驚，由準備製作一刻開始，我便目不轉睛望住師傅一舉一動，吧枱上放了十多款食材，師傅先將青瓜用手指公壓著，然後用純熟刀工打橫快速切條，藝高人膽大。跟住鋪好紫菜、再鋪上薄薄一層舍利(醋飯)，再將唐墨，明太子，鮟鱇魚肝、鮑魚、車海老、中拖羅、椎茸、穴子、玉子、干瓢、青瓜、蘿白逐一放上去。食材多到放唔晒，師傅卻悠然自得地用竹蓆捲好，再切開每人一件放在我面前。
我建議一啖塞晒入口，感受一下日式十餸飯帶來嘅衝擊。FB《香港Omakaseおまかせ關注組》好多大神都推薦Saito嘅太卷，譽為全港第一，我非常認同，為咗太卷，我會再嚟三四五六七次，不過Saito預約困難，下次有排等。聽聞太卷有得外賣($680)，不過材料會有別，唔想等堂食可以諗諗。
Sushi Saito│中環金融街8號四季酒店45樓│25270811