我設想有這樣的一個場面。
媽：「阿仔，同倉鼠BB講拜拜啦！」
仔：「點解呀，我同佢玩得好開心呀，你睇佢幾得意？」
媽：「玩多陣啦，媽媽要帶佢走啦！」
仔：「去邊呀？佢咁細隻，出得街咩？」
媽：「唔係去玩呀，要拎去俾漁護署。」
仔：「唔制，BB係我㗎，做咩要俾人。」媽媽感到為難了……
媽：「我都唔係好明，呢，新聞咪話有倉鼠染咗病毒呀……」
仔：「又唔係我呢隻，關咩事，媽咪你睇清楚先啦，你搞錯啦。」
媽：「我都覺得唔關事，但政府話要喎……」
仔：「拎咗去咁幾時返？」媽媽語塞了，如何說下去好呢？
媽：「拎咗去……就…唔會返…㗎…」
仔：「吓？殺咗BB？唔准呀！」
媽：「媽咪遲啲買過隻……」
仔：「BB只得一隻！佢係我朋友！」……到此，我相信再聰明的媽媽也想不到如何解說，因為這根本不符合常情。
常情是，我們都尊重生命，不會隨便結束動物的生命。常情是，寵物被視為人類的朋友，我們不出賣朋友。常情是，凡事要追本溯源，為甚麼和染疫處所不相關的倉鼠都要處死。常情是，我們教導下一代不要「大難臨頭各自飛」，不是要「不排除任何可能」，要殺他以自保？這些年來，不論是SARS，是新冠疫情，或是甚麼更大的衝擊，香港市民學到最寶貴的，是如何在困難裡互相守護，不離不棄。我們和家人朋友的關係只會更真摯更密切。
力量，來自我們無私的愛。願香港人在疫情下發揮最大的智慧與勇氣，顯露更大的人性光輝。