倫敦有一家遠近馳名的人氣點心店，叫Dim Sum Duck，由遠至Cheltenham、Nottingham的朋友，都好想試一試。不過，由於店子細細，室內連室外只得三十個位，從不接受訂位，要食一定在開店前排隊食第一輪，並要齊人入座，否則要等最少一個鐘才食到第二輪。可是，這無阻一眾粉絲，每逢周末假期永遠長龍不絕，名副其實倫敦第一人氣點心店。
真的無誇張，要去Dim Sum Duck飲茶，最好預餐廳開門前40分鐘排隊，上次星期六去，明明餐廳12nn開門，我11:20am到已排第11個，11:52am已排近三十人，龍尾長到過幾間舖位，絕對唔係講笑，有心去記得早些起身。排在前後的有八成是亞洲面孔，不少是這𥚃的留學生。到等到餐廳開門，可以獲派第一輪入座，終於可以安心，一坐低聽到陳百強的名曲，真的似返回香港老家。這𥚃點心選擇不算多，阿姐非常親切，會同你吹水之餘，又會截停我亂叫話夠食，老闆有年農曆新年，更特別走過來派利是給囝囝，真係好感動。
講到咁人氣，有朋友話看網上食評好壞參半，以我個人經驗來說，幫襯過Dim Sum Duck五六次，只有兩次比較失準，是有些點心蒸得過火，但不算大問題。眾多點心中，小籠包永遠無失準，皮薄又肉汁豐富，我覺得好食過鼎泰豐；沙律明蝦角、蝦餃、燒賣、鳳爪、糯米雞次次都唔錯，有香港酒樓水準；椒鹽鮮魷更是囝囝最愛，夠香口唔油又惹味。不過雲吞麵就不用特別試，食鳳爪排骨飯穩陣好多。如果農曆新年去，我一定會柯打椰汁年糕，煎得皮脆內軟糯，椰汁味香濃，筆者大愛。
Dim Sum Duck 地址：124 King’s Cross Rd, London WC1X 9DS
電話：+44 20 7278 6018