帶工人姐姐去行街
街坊：阿妹去旅行呀？
阿囡：係呀！趁長假期玩幾日，啱啱落機……
街坊：有啲嘢唔知講唔講好……
阿囡：黃太，識咗幾廿年，妳睇住我哋大，有咩唔講得啫？
街坊：係啫！同妳父母真係識咗幾廿年，當時大家都係新婚，一齊入伙，睇住妳哋幾兄妹出世。只可惜妳阿媽走得快……見唔到妳哋幾兄妹咁生性，個個都出人頭地，又孝順！
阿囡：黃太，咩事啫？唔怕直接講喎……係咪阿爸隻狗仔在妳門口大小便呀？
街坊：唔係！嗰啲好少事啫！早兩日，妳哋出晒門，見妳阿爸同工人姐姐落街，兩個拖住手咁行，好似好親密咁……睇到我有啲唔舒服囉！
阿囡：呵！原來呢件事！
街坊：妳哋都知？
阿囡：梗係知啦！全家都知，我哋個個都勸阿爸，但係妳都知：佢好梗頸！勸唔聽！
街坊：唉！咁我戥妳阿媽唔抵啦……
阿囡：吓！應該戥阿媽「擔心」先啱？點解變咗戥阿媽「唔抵」嘅？
街坊：噢！妳阿爸臨老入花叢，連外藉工人都啱喎！所以咪戥妳阿媽「唔抵」囉！
阿囡：啊！哈！哈！咁我明白晒啦！黃太，好多謝妳關心我哋家中各人！阿爸兩個禮拜前入院做咗個小腸氣手術，出院後下肢無乜力，我哋個個勸佢揸拐杖，佢話面子問題唔肯用，寧願叫工人姐姐扶佢，所以咪令大家誤解咗……
街坊：呵！原來係咁！呢次真係愚人節快樂晒添！
【EC生活微積Fun】
周朗感謝各位讀者支持，衝過1300日……特意加推《生活微積Fun》，這是在「職場」和「教育」之外，希望為大家增潤一點素材，一齊「微」觀下在「生活」中「積」極的「Fun」(樂趣)。