頂好大光麵定係出前一丁?
由谷德昭主持的ViuTV節目《茶餐廳》提到「頂好大光麵」，標榜「香港製造」，霎時間引起網上一片熱烈討論風潮，忽然關心起「香港製造」來。KOL連續出FB IG po去呃like，上綱上線食大光麵就等於支持香港，而網媒亦紛紛整合「頂好大光麵餐廳/零售點名單」。其實食個麵啫，使乜搞到咁複雜，我作為用家，最重要係好食，話之你印度製造。
大光麵本身沒有跟味粉，味道上有盲點，只適合配濃味食物例如沙嗲牛肉，一濃一淡互相融和。去九龍城方榮記打邊爐，沙嗲湯底配肥牛&大光麵屬指定動作，盡吸精華杰撻撻，淥麵要爽要腍自己話事，一直係我心目中No.1的沙牛麵。
頂好大光麵少咗餐廳採用有好多原因，好多時係衰在茶記廚房手中。灣仔金鳳茶餐廳係箇中佼佼者，麵身烚到過晒火，發晒脹超腍，沙嗲牛肉仲係凍嘅，一手好牌打到爛晒，廚房處理得極差，我中晒伏。自此我食茶記一定係加五蚊轉丁麵，若配豬扒蛋或火腿蛋，大光麵一定不及出前一丁好食，有啲錢唔慳得。
出前一丁一樣可以煮得唔好食
之不過，食出前一丁一樣會中伏。另一間茶記光榮冰室煮出前一丁有其獨特之法，就係唔落味粉，碗麵上枱時，味粉&麻油交由客人自己落……WTF，廚房有冇諗過，個湯根本冇足夠熱力溶解味粉，最後變成一劈嘢，點解廚房煮麵唔落埋味粉？又係一手好牌打到爛晒。
成敗，很多時與食材或麵餅牌子無關，而是取決於廚房。唔該你哋煮好啲啦，食個麵啫。