Loser唔多講股票，事關有名俾你叫，自己炒股多年輸多贏少，唔係深入研究都唔敢講，舊年十月推介嗰隻楓業教育（1317），講時係兩個幾，最勁抽升到8.64元，上禮拜收5.766元，都算有交待。之但係嘢早前發公布披露的事情，我覺得公司仍然未夠誠實，對呢隻股要抱有介心，暫時都唔會買返。
至於地產投資信託基金，Loser叫人唔好買，事關息口見底，加上經濟轉弱，商場、酒店等租金肯定會調整，於是叫人忍忍手，但估唔到Reits至今仍然表現唔錯，跌咗眼鏡，唯有認衰。
不過咁，有時有啲心水都會跟大家分享。今次同大家介紹隻中銀航空租賃（2588），上市42蚊，上周五收42.45元。你會問，航空業好咩，國泰（0293）份業績差到貼地喎。
超人純官都搞呢門生意
大家有所不知，航空租賃跟經營航空公司係兩門生意，航空租賃簡單講係租飛機，即係好似你買層樓租俾人，每年就係收租金，只要不斷有需求，你就有租收。今天亞洲國家日漸發達，單就中國人外遊以幾何級數上升，未來出外坐飛機就愈嚟愈普及，市場對飛機需求不斷增長，於是乎飛機租賃特別好生意。
呢門生意唔使好似航空公司咁，要俾油價拖後腿，因為佢只係提供飛機就得，油嘅嘢就交返俾航空公司自己諗喇。所以你睇李嘉誠都買咗幾十架飛機，鄭家純間新創建（0659）亦買咗幾十部，就知呢們生意有得做。
好喇，行業有得做，都要睇睇公司好唔好。中銀航空租賃係亞洲最大飛機租賃公司，亦係全球第五大，即係話佢喺亞洲係龍頭，食正亞洲經濟上升個浪。連訂單佢擁有近五百架飛機，出租率係百分之一百，若然以租樓術語講，即係冇空置率。
中銀做大靠山
佢持有啲飛機全部係靚嘢，機齡平均只係三年，十分之新淨，大家有所不知，飛機失事最大原因，十之八九係機齡老化，中銀航空機隊咁新，租值相當高，出事機會亦十分低。
公司剛公布中期業績，盈利上升兩成有多，兼夾有息派，財政狀況十分健康，業務及財務上都理想，𠲖家市盈率都係8.7倍（以中期業績年度化計算），可以講抵買。佢最唔好係新上市，大家或許要睇定啲，但可以講，若佢公布多兩份靚靚業績，就唔止𠲖家個價。
仲有，佢阿媽係中國銀行，要借錢買飛機，可以攞到比別人平嘅利息，而最重要嘅係中國銀行做大靠山，執笠機會十分十分低，揸得安心，所以都唔怕披露，自己喺40-42蚊都吸咗一啲股票。當然，好公司未必係好股，最終股價Loser都冇保證架。