2016年話咁快就過，回顧舊年初Loser叫大家沒好沾手三樣嘢，包括香港樓、人仔及大陸高息債，一年過去，人仔去年貶值接近7%多，大陸高息債變動唔大，而香港樓價就喺年中復蘇，但政府出辣招，整體嚟講升少少，唔買都冇蝕底。
睇返今年投資市場，Loser認為有幾樣嘢都係少掂為妙，首先都仲係樓，雖則樓價由03年到現在升足13年，期間大漲小回，大家都認為樓係唔會跌，甚至有大堆理由去支持：「啟德塊地拍咗天價，未來樓價梗係上升」，「大陸人要走資，嚟香港買樓，樓價點會跌」。
買樓值博率低
究竟有幾多大陸人嚟買香港樓，根本冇一明確數字？即使有一定人數走資香港買樓，能否維持幾耐，又係一個問題，早前阿爺就出招限制大陸人到港買保險，你唔擔保樓會有相同遭遇。
姑勿論點，Loser要指出，樓價升到現水平，再升機會唔係話冇，但上望空間有幾多？美國研究機構Demographia 2016年初統計，以當時樓價跟市民平均工資計算，港人不吃不喝也要十九年先供甩層樓。現時樓價再升少少，年期肯定更長，而今年特朗普上場，美國經濟又逐漸向好，加息將成趨勢；甚至連阿爺都開口話大陸經濟增長唔一定堅守6.5%，即係話對內地經濟有保留，咁多不利樓價因素，何解要冒險入市？投資講求值博率，無必要喺高峰入場。
早前長實（1113）斥資76億向長和（0001）購入飛機租賃公司，就係因為對樓市有保留，冇將資金投放晒喺地產市場，反要搵其它穩定回報項目，你就知連李嘉誠亦睇唔好個樓市。（雖然超人去年睇錯市，話香港衰過沙士，但多年來佢嘅眼光仍然好有參考價值）
投資要站在強勢一方
樓之外，債市都係要少沾手，正如上面講，美國政治經濟情況已改變，債價開始受壓，債市黃金期一去不返。要明白投資須站在強勢一方，冇必要喺利息開始加速上升時，走入去坐艇。
最後就係唔好買地產投資信託基金（Reits），既然息口趨升，呢啲收息嘅產品梗係要小心，你話Reits有4、5厘息喎，但要諗諗，息口再加，市場會拋售收息產品，你諗諗Reits價格跌少少，乜息都補唔返。再者中國經濟放慢板，自由行減少，商舖同酒店會繼續受壓，今日話收5厘息，倘收入減少，明年就唔係5厘喇，你話靠收租派息嘅Reits又點會有運行。