喺股市有一定經驗嘅人應有感受，炒股最重要唔係乜嘢基本價值、技術分析、盤路或財技，炒股最重要係心理，即係點樣克服貪婪與恐懼，呢點好抽像模糊，要在市場不斷浸淫，不斷學習，不斷領會。
除咗個人心理外，點樣去理解市場心理亦係決勝關鍵。許多人認為投資要好理性，事事尋原因，樣樣講理據，絕不盲從市場，甚至要遠離市場，逆其道而行，即係希望做到別人恐懼我貪婪，別人貪婪我恐懼嘅境界。
群眾許多時是對的
事實也沒有錯，要贏大錢真的要跟市場做相反事情，但前提係你要有畢菲特嘅心理質素同眼光，否則你怎知道邊個時候係人人恐懼，邊個時候係人人貪婪？反之，許多時候當群眾都睇好或睇淡時，你別理係啱定錯，市場確實會跟隨大多數嘅取向而行，若你次次認為唔合理，結果大多是輸死都未到價格回歸合理值。
簡單啲講，股市好多時唔係講合唔合理，而係講故仔，講概念，講未來，講憧憬。好似內地公布發展河北雄安新區，雖則未有具體規劃，發展亦需時甚長，但啲相關概念股份馬上炒起，喺河北一帶做水泥嘅金隅(2009)，兩日內股價由3.2元井噴咁上到高位5.25元，爆升8成，雖則呢幾日回軟，但都守到4個幾，未來好有機會陸續有炒作。
跟市場順勢而為
即使你認為雄安新區十劃未有幾多撇，依家都係乾炒，但唔好理，只要股票市場有概念，你無必要扮理智。好多時炒股最重要係估計市場點睇，只要大部份人認同，即使未來未必發生，股價也可以上揚。
你所要做嘅事唔係去計算雄安最終能否成功，而係估計市場點反應，然後跟市場風向順勢而為。你不用當雄安一定成事，就好似之前嘅「一帶一路」、「互聯網＋」或「大健康」，過後又靜返晒，但喺過程中，把握機會，贏錢機會還是蠻高。
投資市場大部份時間係跟紅頂白，做到眾人皆醉我獨醒當然係最好，但大家都係普通人，又點會有股神嘅能耐。