當子華神也Facebook開口講黃牛問題，炒賣黃牛門票馬上變成十萬不赦的惡行，齊齊口誅筆伐、一同聲討。經濟右翼的朋友當然傾向支持黃牛票的存在價值，通常是典型的原教旨論調：價格分配機制的好處，肯出最貴價錢才是真粉絲，一買一賣市場操作合符選擇的自由等等。
黃子華棟篤笑門票掀炒風。(資料圖片)
這些講法，正正就是右派獅子山學會孫柏文和白仲祺的講法。由於廣為社交網絡宣傳，我好難扮睇唔到，也坦言，我分不清當中曲直，因為孫柏文和白仲祺的講法實在錯漏百出，連公關都輸埋。身為經濟右翼，見到這個程度的論述，我真係感到蒙羞。反而同出一源的李兆富則比較合理，照計相似學術背景訓練、類近的意識形態浸淫，水準不會相差太遠。孫白二人係真膠定假膠，我真係看不清。雖然輸埋公關，但獅子山學會至少刷了存在感，贏了「bad news is better than no news」的討論價值。是否值得，就見仁見智了。
如果把原教旨的意識形態立場變成落地的經濟討論，那就要睇你對門票市場和現實世界有幾見解。炒賣門票的確係犯了《公眾娛樂場所條例》第6條，「搵食啫，犯法啊」不是很容易推銷的概念，黃子華講得，但反佔中的人一講，語境又不同了。
矯情、同樣永遠有分加，不少身邊朋友因為買唔到子華神的門票而沮喪，如果令呢班友覺得俾高少少價錢，就可以買到子華神退休前最後的表演門票，他們會支持二手市場的存在。同樣都係「搵食啫，犯法啊」的概念，扭一扭橋，改一改文字用語，觀感可以差好遠。試試叫二手市場轉讓，不要叫黃牛炒賣，係咪好似無咁難聽呢？現實，就係咁膚淺㗎啦。孫白就是太赤裸老實了，但他們至少講中一件事，就是門票價格太低。
因為係黃子華last show，主辦單位計唔到門票真實價值，我唔怪人。不過，扯遠少少，好似周杰倫、久石讓等隔一排就嚟開show，二手市場的價格又夠透明，網上一問一查就知，根本就有往績可尋，但每次主辦方依然以低於上次黃牛炒價去定價。這就是主辦單位的用心，可能是宣傳效應，可能是為了減低風險。
黃子華講中了問題所在，就是在於「內部嘅渠道」，內部人圍飛，才是問題所在。新股上市都有分內部國際配售和對外公開發售。門票同股票有相同之似，以毛記葵涌(1716)為例，暗盤看得出內部承配人無沽大貨，但市場力量已可以推到倍數升幅。門票可否好似股票一樣，有超額按比例回撥機制，就要看技術和主辦單位有幾想圍飛了。潮流興門票實名制，如果「內部嘅渠道」容許粉絲會實名制，我不反對啊，因為韓國天團的粉絲會圍飛，都要答問題過關先有得買，行之有效啊，但公開發售就唔好了。
增加供應，不一定如黃子華般要加開，好像曹星如般直播權買賣分流忠粉和無咁忠的粉絲，不是價格分歧，但卻是降低門票波動的方法。香港人想買飛，那就要有二手市場存在，大家批評的，都係分配機制奇怪，炒價太波動而已。門票似窩輪，價值也有時間值消耗，第一日當然叫晒救命，過多幾個星期，炒價調一調，就無咁大怨氣了。