股份或會放好消息吸引散戶。(資料圖片)
(音樂起……或許黄金，催生了黑暗、爭鬥和怨恨，犧牲了幾多人……城裡暗巷仍有某位在奔波……Woo oh)(字幕：本文純屬虛構，如有雷同，實屬不幸。)
曾講到「尖頭仔」做主席、堅哥幕後操控的GEM上市公司陷入財困，為製造概念集資，堅哥向大老闆侯賽因求助，結果派出「橋王」彼嘉昭協助炒作，「彼人堅呃大聯盟」成立，最終彼嘉昭想到把尖頭仔拉來利用大麻概念炒作，於是他們開始在想如何分工。
尖頭仔(不服氣)： 「雖然三落三起，現在又第四次，雖然暫時『衰咗』，但我永不言敗，現在仲有外父同埋彼大哥睇住，我唔會衰俾大家睇㗎。」
堅哥(憤怒)：「尖頭仔，我一日未肯將Toby嫁俾你，唔好叫我外父，叫返堅哥。我個女同你幾年，你都無好帶挈，依家又要搵彼兄幫手睇睇有無路數啦。」
彼嘉昭(胸有成竹)：「大麻概念點玩，其實想得七七八八。都要同班內地人合作。咁睇來又要搵老細侯賽因幫幫手，他在內地好多人脈，應該幫到。」
堅哥(疑問)：「其實侯賽因乜料，點解佢識咁多內地猛人？」
彼嘉昭：「你有所不知，侯生真係好勁。他外國名校畢業，後來做i-bank，跟咗幾個大老細，學識好多財技，於是自己同親友創業搞股票，可能屋企有些變故，故更加發奮，甚至開始做上市公司，接手一個又一個不可能任務，慢慢就搞大盤生意，亦幫咗好多猛人，於是生意愈做愈大。以前最叻係供股向下炒。」
堅哥、尖頭仔(一頭霧水)：「我以前睇好多報紙，成日鬧股票向下炒，其實咪即係公司合完又供，供完又合呀？」
彼嘉昭(專家上身)：「好多人都唔識咩叫向下炒，以為又供又合不停拋貨。我做莊家咁多年，如果真是堅向下炒，仲邊敢玩隻股？一般來講，連拋貨都唔使做，散戶唔係我哋的獵物，是班碎股黨。散戶錢太少，又唔敢大注，邊度贏到大錢！莊家只是順便食咗呢堆魚。只要吸引到班碎股黨，利用大折讓吸引呢堆人大手供股，之後製造大量差價，等他們上釣，一個幾十萬，幾十個就幾千萬，仲要搵埋班友好，俾佢哋賺少少，一億幾千萬都應該出到，到時造消息，做靚個棚，先引班散戶入來，然後叫晒友好出貨，殺晒他們，之後再買些樓呀垃圾咁，錢都使出來，之後班散戶無耐性出貨，莊家唔托推低個價，再搞多次大供大合，咩錢都賺晒啦。」
堅哥、尖頭仔(附和)：「你真是好堅呀！ 之後靠晒你哋啦！」