末代港叔肥彭重臨香江，喺演講入面批評港獨冇Q用，原本有啲人仲以為佢會搧風點火，點知反高潮，不單批評港獨沖淡民主力量，仲話削弱民主的道德高地，搞到港獨班友冇晒癮。
有時真係唔多明，點解要港獨，同啲年青人傾開，原來有啲後生仔覺得支持港獨係潮流，簡單講就係一個字：「型」。
有朋友話，𠲖家香港同廿幾三十年前唔同，當時冇乜人可以入到大學門檻，部份讀書唔成嘅𡃁仔，叫佢打份牛工又唔願意，有啲唔識嘢嘅就覺得加入黑社會好型，有大佬照住，唔怕俾人蝦，出去浦時，你話我係乜乜安、物物和嘅會員，威啲唔在講，溝女仲容易好多。
時移世易，今日超過十間大學，加埋啲副學士，所謂嘅大學或準大學生多到你唔信，喂！話晒都叫做知識份子，點咁心做古惑仔陳浩南呀。以前啲人學識低就話入社團好有Face，𠲖家你話自己係某某支持港獨團體成員，頭上馬上有光環。
當你開口港獨，埋口港獨，即時層次唔同晒，好似好有偉大抱負，兼夾有崇高理想，別人聽到時都會肅然起敬。再誇啲，當正自己成個辛亥革命義士，隨時可以拋頭顱洒熱血，媾女時話自己支持港獨兼撻朶話係乜乜新政成員，啲女聽到都好仰慕你，埋身都易啲喇。
至於問佢港獨嘅理念或理論，好多𡃁仔都口啞啞，有啲回你兩句，港獨咪唔使俾班土共管，港人治港，總之我哋話晒事，民主自決。你再問深入啲，香港真係港獨，俾你會點治理，佢可能諗都未諗個呢個問題。
香港屬中國一部份，係歷史事實，港人又係中國人，𠲖家社會唔係民不聊生，又冇橫徵暴歛或苛捐雜稅，言論自由跟97前冇乜差別，更加唔會出現南韓總統朴槿蕙甘離譜管治，港獨理據喺邊？其實澳門情況都係俾共產黨統治，點解澳門又冇乜人主張澳獨，有時諗諗都好笑，既然話要港獨，遲啲會唔會有九獨同新獨。