據報迪基亞要求高薪續約。
英超大會疊水，但聯賽競爭激烈比前更大，收入未得保證下，除咗車路士外，其他大會明顯謹慎理財得多。好似曼聯「坦克sir」傳定立《C朗條例》，以後設薪酬上限為周薪20萬英鎊，此舉好似針對下屆約滿嘅鋼門、周薪375,000萬英鎊嘅迪基亞，想續約就要跟般奴費南迪斯同酬，實情喺後C朗年代，隊中無一可獨大。
根據網站《statista》去年尾公布，2022/23年度，曼聯大軍平均年薪以719萬英鎊居首，壓倒679萬英鎊嘅曼城同車路士，比356萬鎊嘅阿仙奴多出一倍，即紅魔平均每人人工達13.8萬鎊周薪，瘦下身都好正常。何況荷蘭主帥用人一向夠吉士，雲高爾用冇名氣嘅路柏特喺世盃守獨木關、「坦克」敢用左閘勞基梳爾踢中堅。只見英格蘭兩大超貴新星中場祖迪比寧咸同迪格蘭賴斯，一度係紅魔頭號獵物，但上屆加盟嘅查頓辛祖可能係一個惡夢，高層對買「三獅新星」有啲怯。如今反而勁傳該隊想借唔識入波嘅般尼荷蘭箭頭韋格賀斯，睇得出「坦克」思維同用人，之前瞓過龍嘅福仔，要買定多個鬧鐘。