當你以為有錢盡情燒，燒得必痛快，但上任兩年已豪花4億英鎊嘅英超「領頭羊」曼城主帥哥迪奧拿，仍然慨歎啲錢唔夠囊括全部冠軍兼爭奪「山神」失敗。列強喪玩金錢遊戲，好戲連場，但將視線下移，又會睇到另一種睇波樂趣——下半季睇實愈執愈靚嘅「狐狸」李斯特城。
神奇球隊屈福特及般尼搞局失敗，英超傳統六強又重新歸位，第六位嘅阿仙奴，現比第七位嘅李斯特城多8分，睇怕斷層至季尾難變；但「狐狸」經過季初動盪後，法國人佩爾繼承冠軍名帥雲尼亞里嘅資產，包括門將卡斯柏舒米高、進攻重心馬列斯同占美華迪之外，班波愈執愈好，排名愈戰愈高。新近用咗唔夠200萬鎊，從法乙簽入22歲嘅迪亞巴迪，立即喺足總盃交出2入球同1助攻，遠勝山神喺曼聯嘅「地標」戰。
呢件好嘢，原來係佩爾個仔喺法國嘅舊隊友。球員買賣，各出奇謀，李城眾主力唞夠，明晚作客鬥本月已用咗4,500萬鎊購入禾確特同辛克杜辛兩鋒嘅愛華頓，客軍坐和望贏。
