英超「藍紅」大戰見證當今歐洲巔峰對決，只擔心兩隊主力去得極盡，回氣唔切，踢歐聯有一定危機，尤其係「藍月」作客鬥擅打鐵桶陣嘅馬體會，小心輸突擊。
英超兵團今周喺歐洲三盃5路興兵，最要留意出戰價值最低歐協聯嘅「狐狸」李斯特城。對聯賽排中游嘅「狐狸」，呢場波如果贏到「主場遇強即屈」嘅荷蘭勁旅燕豪芬入4強，唔單止起碼多收100萬歐元獎金，之後下一圈對手只係羅馬或挪威奇兵波林基林特，攞埋冠軍仲可直入來屆歐霸分組賽。
「狐狸」本月明顯反彈係靠一眾主力傷兵康復，班波係值英超中上游級數；老牌射手占美華迪唞緊，但突然彈出耀眼青訓兵杜斯貝利賀爾，呢位左腳厲害嘅23歲中場，3年前嚟過香港踢七人賽，但前兩季借去地獄英冠返嚟唔同晒，依家成個韋斯咸中場、三獅「潛力王」迪格蘭賴斯嘅打仔格。「狐狸」季尾得此猛將場場坐鎮中場可平衡攻守，今夏又可以賣走占士麥迪臣或者泰利文斯，賺一大筆；跟贏到歐協聯一樣，呢個「寶藏」一樣咁大。
杜斯貝利賀爾(左)「1入球1助攻」助李城2比1挫水晶宮。