大巴黎之煉成

喺現今球壇超密嘅賽程下，唔淨止英超球員要捱得，就算連競爭力度原本最細嘅5大聯賽之一法甲都唔能夠倖免。王者巴黎聖日耳門經歷今夏世冠盃決賽輸波嘅洗禮，整個夏天嘅空檔唔夠一個月，後遺症係唔少主力五勞七傷，三線猛將馬昆奴斯哥利亞、祖奧尼維斯同金球獎得主奧士文尼迪比利，上半季唞多過踢。球隊喺剛歇冬嘅法甲罕見唔係榜首，俾近10場聯賽9勝嘅朗斯1分騎住，睇嚟法甲今季有得鬥下。大巴黎今年踢咗65場波，勝率係七成半，但一班球星未放得冬假；剛剛又出發去咗卡塔爾同法林明高爭洲際盃，之後返嚟仲要踢法足盃64強，佢哋全年比賽場數舊紀錄係2017年48場，今年破紀錄要多踢19場，認真瘋狂。

大巴黎未殘，歐聯排緊第3，當歐洲列強為傷兵多叫苦連天，巴塞同皇馬黯然失色；佢哋嘅西班牙名帥安歷基除咗tika-taka戰術了得，最勁都係大膽重用新人，仲順便幫「高盧雄雞」培育新星上位，當一眾大牌主力下半季歸位，睇嚟今屆歐聯爭霸都係大巴黎單挑英超群雄格局。