邊隊會上到世界盃決賽周歐洲區嘅尾班車，可能會由一個「神」蹟決定。
除咗「三獅兵團」英格蘭早就出線之外，對上3屆入唔到決賽周嘅愛爾蘭，係「英迷」最後希望；但首回合踢得好啲嘅丹麥，今晚作客愛爾蘭，晉級機會似乎較大。事關丹麥雖然無緣對上兩屆大賽決賽周，但睇番依家嘅陣容，比以前強好多，全隊大半數國腳喺西歐搵食，比愛爾蘭一眾留喺英國搵食嘅「井底蛙」，進步好多。最高卡士，當屬近季愈踢愈好嘅攻中基斯甸艾歷臣，但呢位熱刺指揮官上次被對手嘜得好緊；如果比賽形勢繼續膠著，丹麥「神」級人物賓特拿，又可大派用場。
丹麥6位入選前鋒，以賓特拿級數、見報率最高，年紀最大亦入波最多，6人之中只得佢回流北歐搵食；佢喺挪威洛辛堡突然回復昔日「神」級表現，入球不絕。今場估計Lord賓又會先做後備，但佢比賽中每有神來之筆，如果今場入到波帶領到呢支「神話」球隊晉級，話唔埋29歲仲可以博到最後一次回流西歐揾食都唔出奇。
