現今足球，要管治整個大陸板塊、聯賽甚至一支球隊極難，強如美斯跟C朗年華老去、世足先生「羅拔仔」只是一位入球機器，後起嘅基利安麥巴比去年連失歐聯同歐國盃，世界新球王未見有新人選，反而一啲老將表現更令人拍案叫絕。數英超近年最猛中場，已過30歲嘅奇雲迪布尼當之無愧，傳球妙到毫巔、射門勁如炮彈，剛戰曼市打吡繼續在場上顯示強大統治力；可惜不論喺比利時國家隊或者球會級都總與最高榮譽擦身而過。奪標要盡收天下精兵，救亡嘅難求一位領袖級將才，所以維拉找到古天奴、賓福特收留基斯甸艾歷臣，都係得到相熟領隊出手，否則以古仔嘅天價周薪同艾歷臣嘅健康狀況，未必有人夠吉士請佢哋返英超。結果上輪英超，古天奴1入波及1助攻，狀態持續上升；而艾歷臣更係大半年以嚟首踢正選，喺《BBC》上輪英超每場最佳球員評分，佢得到9.25分，成為強中強；場上恍如超新星，無論觸球及傳送次數，冠絕賓福特，球隊留級指數大升，絕對可登上英超年度一大奇聞。