英超球星嘅議價能力，喺依家咁最重要嘅時刻做得好，分分鐘換嚟一生富貴。好似「山神」阿歷斯山齊士唔知係情傷定身傷過度，50萬鎊周薪排英超第一，喺曼聯一季半夾埋踢咗29場聯賽入得3球；山神未來三季除稅前，粗略計可以揾多近8億港元人工，都唔知點多謝當年簽佢嚟嘅摩佬。又多得摩佬出手，搞到阿仙奴前帥雲爺爺去季走人前「失控」，用35萬鎊周薪挽留「大眼仔」奧斯爾，但佢表現一樣名不副實；艾朗藍斯養傷中，中場孭重飛嘅大眼仔，前途繫於未來數仗。
再數明天曼市打吡，英超現時5大最高人工者，4人嚟自曼徹斯特球會。曼城奇雲迪布尼今季成日傷；仲想扭加人工嘅保羅普巴同越嚟越肥嘅箭頭盧卡古，啱啱喺紅魔慘吞拖肥4蛋中，如夢遊球場，兩人加埋隨時出得番嘅山神，唔好理球會想曼城定利物浦封王多啲，呢場係為曼聯爭前四嘅最後機會。仲唔出一分力，真係唔好以為「娃娃臉殺手」蘇斯克查外表友善。紅魔季尾係咪大清洗，呢場波極為關鍵。