光頭嘅人，唔止可能富有啲，仲少啲頂上煩惱。法國光頭球王施丹，風光捧住3個歐聯冠軍，18年夏天瀟灑離開嘅皇馬；唔夠一年又食回頭草，再接手後C朗年代嘅「銀河爛隊」，季尾10場差到只贏4場，又搞唔掂唔肯走嘅大牌加里夫巴利，原來光頭施丹毫無煩惱。
施丹上次拋低一句「球會要改變」走人；最終若冇一個喺上屆西甲輸俾巴塞成條街嘅爛攤子，可能霸氣會長佩雷斯未必肯狂開水喉俾施丹番嚟大搞。依家轉會新聞，除咗不斷係各大會搶阿積士金童馬菲斯迪歷特外，皇馬幾乎每天佔據足球頭條，先後用3億多鎊簽下包括夏神等數將，又快又狠；估計巴利、占士洛迪古斯同馬高阿辛斯奧等不受重用舊人，會知難而退，騰出薪酬空間繼續掃貨。
新近又傳基利安麥巴比同保羅普巴去皇馬，話題性十足；但反而「日本美斯」久保健英，只花了皇馬二百萬鎊及萬多鎊周薪已成功簽下，姑勿論神童係咪真有神力，呢個得來唔易嘅低風險收購，可能先係施丹嘅傑作。