英超近年英格蘭波士數目同領軍威力走低，今屆暫時得返5個。3位著名「三獅」中場林柏特、謝拉特同柏加嘅教波級數，同球技仲差一大截，反而踢波唔叻嘅紐記賀維同第4季帶白禮頓嘅波特(Potter)仲有料到；其中白禮頓上屆突破性取得第9名，今屆又被拆骨一樣咁勁，難能可貴。佢當年簽返嚟嘅「中佬」拉爾拉拿、韋碧克同祖爾韋特文，仲喺3線主力；近兩季畀豪門撬走中後場主力丹般恩、賓韋特、古古列達同比蘇馬，球會淨賺逾億英鎊，季初用舊將戰力無損，打敗曼聯、韋斯咸，賽和紐卡素，3仗形勢都不佔上風，但「防反」踢法得心應手。用fit到爆嘅「黑帝」韋碧克喺前場擾敵，一眾後上殺手先係搶分重心；到「韋帝」力竭，馬奧比、安達夫同三笘薰先會慢慢上場接力，中型班前線冇幾多隊有咁嘅變化同本錢。
領中型班講團結踢鬥心、要好食不用好睇，成日全黑打扮、鬍子滿臉嘅波特先生，對比另一南軍「般茅」著到好似哈利波特校友嘅波士柏加，單計造型都殺晒啦。
