沙拿與紅軍
利物浦手執9分優勢，嚟緊周中北上鬥神經刀紐卡素同之後默郡打吡作客愛華頓，呢刻就算好大機會攞到聖誕冠軍，計歷史往績，仲有大約一半機會被對手反cup。只係曼城已暴露主力老退、鬥心下滑嘅問題，今屆分數最終被新帥上場充滿朝氣嘅死敵紅魔趕過唔奇。
呢刻英超三甲隊同手執一張王牌，就係入波同助攻了得嘅射手，包括紅軍穆罕默德沙拿、阿仙奴布卡約沙卡同車仔高爾彭馬。計前景，後兩者貴為英格蘭新星，球會無價寶，後上封王嘅爭霸關鍵。只係紅軍贏曼城，年過30嘅「一前一後」大將沙拿同華基爾雲迪積克，仍然非常出色；不過二人聯同右閘阿歷山大阿諾特都係季後約滿，其他大會嘅「約滿」球星包括熱刺孫興民、阿仙奴湯馬士柏迪、曼聯哈利馬古尼同曼城奇雲迪布尼等。續約人工往往更高，但往後幾年表現又未必再有保證；只要記得阿仙奴奧巴美揚同曼聯拉舒福特簽下肥約後嘅跌watt表現，被指孤寒的紅軍美國班主約翰亨利，夠唔夠膽見勢好，為求重奪今屆英超，心雄早押重注？