阿諾特絕配皇馬
根據著名足球網站Transfermarket統計，英超約有七、八十名球員喺季尾滿約未有著落，大部分年逾30，但當中不乏寶藏球員，最重要唔使俾轉會費。掛頭牌係26歲嘅英格蘭右閘國腳阿歷山大阿諾特，佢兩位尚未公布續約嘅隊友華基爾雲迪積克同穆罕默德沙拿，身價排第2、3位，三人身價合共估值1億6,800萬歐元。續定唔續約，利物浦高層心裡早有數，只係英超未到手唔公布。雲迪積克同沙拿年紀唔輕，續長約呢兩注押得好大，不過估計史諾唔敢放手。
反而阿諾特已準備夏天過檔皇馬，以往兩位英格蘭名將麥馬拿文同奧雲離開紅軍加盟銀河艦隊，唔算成功；但喺現今足球大潮流，佢踢到右閘同中場，又叻射罰球，阿諾絕配皇馬。始終皇馬以攻代守，阿諾雖然近年間中畀對手翼鋒喺邊路狂爆，惹來紅迷起哄；但嚟到星味十足嘅皇馬，佢嘅全才嗜攻優勢可盡情發揮，攞住一份估計25至30萬英鎊周薪嘅長約，享受馬德里暖和天氣，留返以往嘅蜘蛛頭髮型，功成身退，完約告別踢咗20年嘅利物浦，無悔無憾。