沙拿高薪變低能？
利物浦開季差到難以置信，高普宣布投降，今屆聯賽冠軍免問，一個時代嘅終結。傷兵不停、防線崩潰，而新中鋒達雲紐尼斯人氣俾曼城嘅艾寧夏蘭特完全比下去，進攻模式待變，紅軍似恒指未見底部。沙拿季前獲多簽3年，周薪加到35萬英鎊，列今屆英超人工排名榜第5位，有啲焗簽。利物浦近年作風平實，但高普都續約，冇理由肯一併放走晒兩位非洲雙傑(文尼投拜仁)；但隊內人工一人獨大，隨時係計時炸彈，阿仙奴刮得起「青春風暴」前，近年經歷3次「災難」，山神、奧斯爾同奧巴美揚，續肥約即走下坡，鬥心問題，唔係個個係C朗。
沙拿啱啱鬥阿仙奴，俾5萬英鎊周薪、改打左閘嘅富安健洋嘜死；高普60多分鐘換走佢，係沙拿今屆第一次冇踢足英超，狀態唔係差，但合拍乏人，好難要求佢一個人再扭幾個入波。沙拿上屆頭8場英超入7球，今屆暫入2球；上屆第9場鬥曼聯入3球，而今屆第9場係嚟緊周日迎戰曼城，紅軍都係盡快鎖定歐聯出線，今屆專攻盃賽較實際。