好欣賞葡超包尾比蘭倫斯嘅勇敢！上月尾隊內疫情大爆發，27人中招，連兩個龍門得9個出場，結果半場輸賓菲加7粒；下半場最後傷剩6人喺場內，賽事腰斬。佢哋相隔兩個禮拜再出場，最終齊人都被圍揼下，僅輸0比1俾艾斯杜尼。葡超波未必好多人關心，唔似得英超球星位位身嬌肉貴，但點解英超咁輕易就係咁改期？如果周圍飛去比賽，中招難避免，但英超每隊都有廿多位當打球員，有冇機制去判斷究竟有幾多球員中招，場波先要改期？球隊對球員喺大戰前嘅自由係咪太寬鬆？英超年尾賽期好重要，隊隊波密密踢，一旦隊內爆發，可能成個假期都可以約埋開派對。但同香港賽馬一樣，好多球迷視英超為疫情下嘅最佳娛樂，隊波有多幾位周薪3、4百萬港元嘅奧巴美揚，唔知為咗紋身定接病母回英，可以自由來回歐洲嘅話；一旦中招，就火燒連環船。你態沉可能想去散心啫，啱啱撻著副偈嘅年輕前鋒加比爾馬天尼利同成班爭上位嘅小「兵」唔係咁諗，所以兵工廠真係要好好處理。
日報