酋長球場上空嘅氣壓，好耐冇試過咁低。周日對白禮頓，阿仙奴近7季主場聯賽尾場首次不勝而前四夢碎；以往雲爺爺年代，成績幾差都好，埋尾喺主場都會做齣好戲冧球迷。艾馬利就唔識做，一手送別忠臣艾朗藍斯及另一傷兵韋碧克，英國人喺隊內勢力幾近被殲滅。艾馬利同阿仙奴嘅成敗，將取決於佢嘅最強後盾──歐霸盃。艾馬利曾帶領西維爾喺歐霸盃3連霸，阿仙奴亦領先緊華倫西亞兩球，但喺歐霸嘅奪標行情，始終唔夠車路士看漲係有原因；防線老化嚴重，華倫啱啱大炒侯爾斯卡6比2，磨利刀等喺主場反撲阿仙奴。隊長中堅哥斯尼頂唔頂得埋呢鋪，會係阿仙奴可唔可以晉身決賽嘅關鍵。明晚作客荷蘭嘅熱刺都好狠，聯賽自暴自棄，好多人情感上捧荷蘭復興力量阿積士入歐聯決賽，但隊波仲好後生，近兩場歐聯主場都不勝，領先緊一粒反而驚就住踢，小心熱刺呢場由「老孫」帶動踢出真火，嚇你一跳。