夏季轉會市場，出奇淡靜，尤其英超Big Six。據英國《衛報》統計，由去季季尾至上周末，涉及英超球會嘅轉會交易，僅逾百宗，涉資2.6億英鎊，當中包括夏薩特告別英超投皇馬，近9,000萬鎊嘅交易。入貨嘅英超球會，暫時以韋斯咸簽下維拉利爾中場柏保路科奴斯，以及升班馬維拉簽入布魯日射手衛斯理摩拉斯最闊綽，各盛惠二千多萬鎊，名氣一般。Big Six暫時唯一重要交易，係曼聯購入威爾斯新星丹尼爾占士。
新一屆英超早開鑼，7月中會陸續開操，但列強好似好淡定。撇開無帥嘅車仔今夏被禁入貨只能回收外借兵，Big Six其餘5隊無論係budget少嘅阿仙奴、還新球場債嘅熱刺，又或者油元無盡嘅曼城，估計眾隊「獵物」短期內會陸續曝光，以趕及在8月8日轉會關窗死線前完成。不過，暫時傳出超過5,000萬鎊嘅「大刁」喺晒國內，包括李斯特城中堅哈利馬古尼、水晶宮右閘雲比卡沙同前鋒韋費特沙夏，卻未見各地新星有加入動靜，如屬實，英超失色了。