今天大除夕，英超已踏進下半季，今屆特別難估，只見狼隊早前雙殺衛冕曼城，確認傳統Big Six瀕臨瓦解；除遙領嘅紅軍外，上半季冇一支所謂強隊喺戰績，戰術同用人上有穩定發揮，呢點可能因為唔少球隊喺軍容同管理上，已逐步趕上；之後開返歐洲賽，列強表現反覆或更加劇，包括哥迪奧拿今屆幫唔到曼城攞歐聯嘅話，自行告退機會唔細。
英超反覆，但有一隊中型班卻愈嚟愈穩陣，佢就係由英格蘭連英乙四級聯賽中，年紀最老領隊鶴臣帶領嘅水晶宮。今屆佢哋最勁留得住主將韋費特沙夏，佢雖然好遲先開齋，但隊波走勢一直平穩到好似條橫線咁去；近乎全英超攻力最弱、踢咗20場聯賽單計上半場僅入4球，慢熱都離奇、勝和負暫接近各三分之一。隊中冇一位高效射手，又冇助攻王，但總好似鶴臣咁，天寒地凍仲不時企喺場邊教路，有心有力。早前傳聞佢哋放緊盤，市值二億幾鎊，聽晚作客鬥包尾諾域治，贏埋有30分，護級成功機會話咁快已接近完成，賣盤叫價又可以高啲咯。