歐洲兩大盃賽一散，英超即喺今、明兩晚打快車，呢個時期亦係領隊保命嘅重要日子；榜尾嘅錫菲聯領隊韋達同西布朗波士比歷固然緊張，有啲大球會嘅波士聖誕應該坐立不安，但要留意倫敦細會富咸近期表現大幅上升，少帥柏加嘅果敢佔重要元素，帶來重要嘅啟示。
睇返佢哋升班後首場英超即吞阿仙奴3蛋嘅陣容，對照啱啱主場僅畀衛冕嘅利物浦逼和，全隊狠換10個正選。上屆英冠射手阿歷山大米祖域季初連番甩轆，已放入雪櫃；隊波亦全面以地面進攻為主，前場走動極多，鬥心足有朝氣。大名鼎鼎門將艾路拿、車路士借將兼曾係「三獅」希望嘅羅夫度斯卓克派牌，同前線兩位好波之人艾雲卡華利路，同終會成大器嘅盧卡文嘅竄擾力，配合出名窄場嘅卡雲農舍，年尾前分別喺明晚主場鬥白禮頓、作客鬥紐卡素、主場鬥修咸頓同作客熱刺，4場搶到5至7分唔出奇。打咗12場，現時排尾三嘅富咸只係比場場出「冇火三叉戟」嘅阿仙奴少5分，倫敦大細會，有時唔使分得太清楚。